Gómez-Reino aposta por un goberno progresista xunto con G. Caballero e Ana Pontón

Móstrase optimista sobre o futuro de Alcoa e critica a falta de "previsión e planificación para minorar o perigo de incendios no monte".

Por Europa Press / Redacción | SANTIAGO DE COMPOSTELA | 31/05/2020 | Actualizada ás 18:15

Comparte esta noticia

O candidato á presidencia da Xunta de Galicia en Común-Anova-Mareas, Antón Gómez-Reino, subliñou este domingo que o seu homólogo do PSdeG, Gonzalo Caballero, a candidata do BNG, Ana Pontón, e el mesmo non son "rivais políticos".

Así o quixo trasladar este domingo ao conxunto da cidadanía galega nunha entrevista na Cadena Ser, recollida por Europa Press, na que o tamén deputado de Unidas Podemos asegurou que "o conxunto das forzas progresistas" poderían constituír "unha proposta de Goberno". Considera que "hai xente que non quere tres candidatos, senón un goberno" e unha proposta de Executivo progresista sería "formidable" desde o seu punto de vista.

Coa vista posta nos comicios electorais, que se celebrarán o próximo 12 de xullo en Galicia, Gómez-Reino cre que a presenza do seu partido nun suposto goberno tripartito achegaría a transformación que tamén existe agora no panorama estatal, con Unidas Podemos no Executivo central.

O candidato exemplificouno coas modificacións que se deron no ámbito laboral ou coa aprobación de medidas como o Ingreso Mínimo Vital, que hai seis anos tachaban de "tolemia" por só propola. Ao seu xuízo, é factible crear este tipo de poder executivo ao mando da Xunta de Galicia, xunto con dúas patas máis, "a socialdemócrata e a nacionalista".

CONDICIÓNS DEMOCRÁTICAS

Por outra banda, Gómez-Reino tamén falou sobre as condicións sanitarias e democráticas que presenta esta cita ás urnas e, acerca das segundas, cre que "non serán os magníficos profesionais da CRTVG" os que tomen decisións sobre como garantilas.

O deputado considera que será o propio Núñez Feijóo o que decida sobre a celebración de debates electorais e mostrouse preocupado polo protagonismo dos carteiros no voto por correo. Neste sentido, apostou por reforzar o servizo postal, tal e como xa demandaron os sindicatos.

En todo caso, as expectativas do candidato de Galicia en Común apuntan a que "as condicións" da Comunidade para que se produza o cambio político "permanecen intactas", a pesar da "propaganda" do presidente da Xunta durante a pandemia.

NINGUÉN DEIXARÁ CAER ALCOA

Sobre outros asuntos de actualidade, como o anuncio de peche da planta de Alcoa en San Cibrao (Cervo), Gómez-Reino asegurou que "nin o Ministerio de Industria nin nós imos deixar caer a Alcoa San Cibrao". Nunha xornada na que miles de persoas paralizaron a autovía A-8, o portavoz de Galicia en Común mostrouse optimista sobre o futuro da factoría. Considera que aínda hai marxe para a nacionalización que demanda o seu partido "buscando o mecanismo de intervención e sendo moi rigorosos" con todo iso.

MANDO ÚNICO PARA EMERXENCIAS GALEGAS

Por outra banda, Antón Gómez-Reino tamén reclamou nesta xornada, a través dun comunicado, que a Xunta estableza un "marco normativo que centre nun mando único a coordinación das emerxencias galegas, cun 112 de xestión pública".

Criticou que os novos riscos forestais desborden as "capacidades humanas e materiais coas que Galicia encara a campaña de verán" e achácao á falta de "previsión e planificación para minorar o perigo de incendios no monte".

Despois de reunirse cos bombeiros forestais galegos, Gómez-Reino considera que "o diagnóstico demoledor" extraído "agrávase coa falta de previsión, limpeza, formación e anticipación na loita contra os incendios", que son "ferramentas clave, máis aló da propaganda insultante da Xunta de Galicia".

Liña seguida, denunciou que o Goberno galego se apresurou "a anunciar o Pladiga 2020" obviando que o Consello Forestal non contou cos axentes sociais para aprobalo e que estes o consideran "ineficaz e insuficiente".

A aposta de Galicia en Común sobre este asunto pasa por un marco normativo que permita a coordinación integral das emerxencias galegas con "capacidade de resposta e interacción entre corpos e o reforzo dos medios humanos e materiais precisos para afrontar a situación do monte e os riscos actuais".

O candidato de Galicia en Común, Antón Gómez-Reino. GEC
O candidato de Galicia en Común, Antón Gómez-Reino. GEC | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 4 comentarios

4 miedito

Só pensar nun tripartito, coas liortas que levan entre eles, xa da arrepíos.

3 Gamela

Primeiro pagar os ERTEs que aínda non se cobraron ! Segundo publicar no BOE o Decreto do IMV e mirar a forma de que a burocracia non demore 3 meses en pagalos (se é que algún día os pensan pagar, e non se convirten en puro ANUNCIO!) Terceiro (se as urnas falaran a favor) quen ía ser o Presidente do Tripartito ? Gonzalito - Abel - Carmela ? E por último que pensan votar o mércores ? Seguir afuciñando á xente baixo un Estado de Alarma insoportabel ? https://twitter.com/00Gamela/status...

2 Casoplon con criadas galegas

Por si acaso queda sen escano, este Gomez-Reino de España non renuncia ao que ten en Madrid.

1 cachamuíña

Todo un visionario este Antoñito!! É que non hai outra forma para gobernar Galicia que non sexa arrexuntarse todos os demais contra o PP. E aínda así...veremo-lo que pasa.