En Marea esixe á Xunta "explicacións" por "mentir á cidadanía" sobre a apertura de centros de día

Feijóo anunciou que estes espazos non abrirían ata setembro, pero "o plan de reactivación destes servizos do Sergas" recollía que podían reactivarse na fase 1.

Por E.P. | SANTIAGO DE COMPOSTELA | 31/05/2020 | Actualizada ás 18:39

Comparte esta noticia

A portavoz de En Marea, María Chao, esixiu ao presidente da Xunta, Alberto Núñez Feijóo, "explicacións" por "mentir á cidadanía" e "terxiversar a documentación" para "ocultar a mala xestión e descoordinación entre Consellerías" sobre a reapertura dos centros de día en Galicia.

Segundo explicou o partido este domingo nun comunicado, tras o Consello da Xunta do venres, Feijóo anunciou que os centros de día non abrirían ata setembro. Con todo, "o plan de reactivación destes servizos do Sergas" recollía que "este recurso poderían abrir nos territorios que pasasen á fase 1 da desescalada", como foi o caso de Galicia.

Por este motivo, En Marea acusa a Feijóo, "nun exercicio de ocultación tramposa", de improvisar "unha basta solución para evitar problemas" e facer "desaparecer a indicación referida á apertura dos centros de día do documento, enganando á súa poboación e faltando o respecto a todas as profesionais do sector sociosanitario de atención diúrna".

Ademais de esixir unha explicación por estes feitos, Chao tamén demandou "unha solución real para as profesionais dos centros de día como para as familias de persoas maiores afectadas por esta medida". Chao argumentou que "non considera de recibo xogar desta forma con centos de familias que xa reorganizaran a súa vida laboral e familiar, ante a previsible apertura dos centros".

Tamén criticou que "o único que recibiron" foi "o anuncio de Feijóo pola TVG de que recibirían unha suposta axuda, da que a presidenta da Xunta nada concretou".

A conselleira de Política Social, Fabiola García, visita o centro de día da Pobra.. XUNTA
A conselleira de Política Social, Fabiola García, visita o centro de día da Pobra.. XUNTA

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta