Estas son as principais propostas dos ecoloxistas para as eleccións galegas do 12X

A Federación Ecoloxista Galega (FEG) lanza este venres, con motivo do Día Mundial do Medio Ambiente, unha batería de propostas para que os partidos que concorren ás eleccións galegas do 12 de xullo as incorporen aos seus programas. Entre elas, suxire "abandonar o carbón", unha reforma fiscal "verde" e unha "nova cultura da auga".

A través dun comunicado, esta Federación, que agrupa varias entidades ecoloxistas e naturalistas, explica que as súas iniciativas buscan un "cambio na xestión pública cara a un modelo máis ecolóxico e sustentable" na Comunidade galega.

Ademais de reducir o consumo de enerxía, a FEG propón "descarbonizar o transporte" con "menos vías de alta capacidade" e "máis tren de proximidade" e aplicar unha ordenación do territorio que "limite drasticamente o crecemento urbanístico e defender a costa".

Así mesmo, os ecoloxistas suxiren "ordenar a industria extractiva con criterios sociais e ambientais", defender a "soberanía alimentaria" de Galicia apostando por un rural e un sector mariño "vivos", unha "nova cultura da auga" e traballar en "ecofeminismo".

No ámbito dos refugallos, propoñen abandonar "o modelo baseado na incineración e o vertedoiro" e, por tanto, "pechar" a Sociedade Galega do Medio Ambiente (Sogama) para "promover a redución, a reutilización e a compostaxe" dos residuos urbanos.

Todos estes puntos buscan, incide a FEG, contrarrestar o "esgotamento" dos recursos naturais e o "incremento das desigualdades sociais", que "son de tal magnitude que o futuro goberno de Galicia enfróntase ao enorme reto de promover un cambio radical nos diferentes campos de xestión pública".

"Agora máis que nunca, tras a experiencia vivida pola situación de alarma sanitaria derivada da COVID-19, debemos ser conscientes e actuar en consecuencia polo coidado da nosa contorna", apostila a Federación Ecoloxista Galega.

Protesta contra as centrais térmicas ante Endesa As Pontes. CEDIDA, 'APAGA O CARBÓN'