O Congreso rexeita devolver ao Goberno a 'lei Celaá', que continúa a súa tramitación

O Pleno do Congreso rexeitou este mércores as tres emendas á totalidade que PP, Vox e Ciudadanos presentaron á Lei Orgánica de Modificación da LOMCE (LOMLOE), máis coñecida como 'Lei Celaá', para tentar que o texto fose devolto ao Goberno. A norma continuará a súa tramitación na Cámara baixa.

As peticións de PP, Vox e Ciudadanos contaron co único apoio dos partidos que as presentaron, ademais do dos dous deputados de Foro Asturias e Unión do Pobo Navarro.
Durante o debate no Pleno, Celaá advertiu que quen rexeite a súa LOMLOE estará "a defender o mantemento" da política de recortes en educación posta en marcha polo PP a través da actual lexislación vixente. Ademais, rexeitou as tras emendas á lei, asegurando que "os argumentos que se presentan" nelas "non responden o contido".

DERROGACIÓN DO DESPEDIMENTO POR BAIXAS

Doutra banda, o Pleno do Congreso aprobou este mércores o proxecto de lei de derrogación dos despedimentos por acumulación de baixas médicas, pero fíxoo sen introducir ningún cambio no decreto que está en vigor desde hai tres meses. Agora o texto tramitarase no Senado.

A aprobación da lei contou cos votos do PSOE, Unidas Podemos, Esquerra Republicana, Ciudadanos, Junts, PNV, EH-Bildu, as CUP, Más País, Compromís, Teruel Existe, Coalición Canaria, Nueva Canarias e o BNG. O PP, UPN e Foro Asturias abstivéronse, mentres que Vox votou en contra.

Esta derrogación está xa en vigor, pois procede dun decreto lei publicado no Boletín Oficial do Estado (BOE) e convalidado o pasado mes de marzo polo Congreso. Entón decidiuse tramitar a modificación legal como proxecto de lei, permitindo así emendas dos grupos para tentar modificalo.