Por Europa Press / Redacción | SANTIAGO DE COMPOSTELA | 20/06/2020 | Actualizada ás 21:00
Os principais colectivos médicos rexeitaron o bono de 250 euros que o presidente da Xunta anunciou que lles daría aos traballadores sanitarios, de residencias e de centros de atención á discapacidade pola súa loita contra a COVID-19. Tanto o Colexios Médicos galegos como a delegación en Galicia da Confederación Estatal de Sindicatos Médicos (CESM) consideraron "indigno" esta dádiva e pediron que ser tratados con "dignidade e non frivolidade".
Así, nun comunicado, o ente colexial, que reúne a máis de 13.000 facultativos, mostra o seu "máis rotundo rexeitamento" ante "tan singular medida". "A nosa deontoloxía e o noso xuramento hipocrático impídennos aceptar propinas como esta", indica.
Ademais, destaca que os sanitarios cumpriron coa súa obrigación nestes meses de crise sanitaria e dérono " todo", cunha entrega levada "ao límite" e arriscando a súa propia saúde. Por iso, agora reclaman "estabilidade no traballo, non contratos temporais, e recursos suficientes" para desenvolver o seu traballo "nas mellores condicións de seguridade e eficiencia".
"Nunha palabra, pedimos que a administración nos trate coa consideración debida e reforce o noso sistema sanitario para facer fronte a continxencias como a que vivimos e estamos a vivir", insiste o Consello.
Aínda que traslada a súa "solidariedade" á hostalaría, un sector que a Xunta pretende estimular con este bono, que se poderá gastar en restaurantes e aloxamentos, a organización de médicos indica que hai "medios para socorrelo sen caer en medidas pouco serias e que soan a improvisación".
CESM
Pola súa banda, a delegación en Galicia da Confederación Estatal de Sindicatos Médicos (CESM) manifestou o seu rexeitamento ao cheque de 250 euros para sanitarios anunciado este venres polo presidente da Xunta, Alberto Núñez Feijóo, e cualificou a medida de "propina" e "tomadura de pelo".
"Se realmente quere recoñecer o inxente labor desenvolvido por este colectivo na loita contra a COVID-19, reverta todos os recortes salariais, sociais e asistenciais que perdemos por mor da crise de 2009", replica o sindicato a Feijóo nun comunicado remitido este sábado.
En lugar deste bono, que ve "indignante", a CESM reclama medidas ás que o Servizo Galego de Saúde (Sergas) e a Consellería de Sanidade "fixeron caso omiso", a pesar de que algunhas delas foron pactadas, denuncia. Entre elas, pide que se elimine a precariedade na contratación, que haxa listas transparentes e que se mellore a atención aos pacientes.
Este tipo de cambios, expón, son os que esperarían das autoridades sanitarias "se realmente queren ter un xesto de recoñecemento". O cheque "produce o efecto contrario ao perseguido, en plena campaña electoral", critica a organización.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.