A xunta electoral volve pedir á Deputación de Ourense a retirada dunha nota "partidista" da web
A institución que dirixe Baltar alegou que se cambiou o titular "O PSOE de Ourense en contra dos autónomos" por "Rodríguez Villarino en contra dos autónomos".
Por E.P. | OURENSE | 22/06/2020 | Actualizada ás 18:34
A Xunta Electoral Provincial de Ourense volveu apercibir á Deputación por unha nota informativa colgada no seu portal web en relación aos autónomos e que o PSOE denunciou por "partidista".
En concreto, segundo a resolución á que tivo acceso Europa Press, a xunta electoral volve acordar requirir á Deputación para que "se ateña ao acordado" previamente e proceda a reducir "ao puro contido institucional" a información e, se iso non fora posible, que proceda á súa retirada.
En todo caso, estima "non procedente" remitir as actuacións a Fiscalía ao non concorrer "motivos de fondo sobre un incumprimento malicioso do ordenado pola xunta, reiterándose no contido da resolución ditada con data 15 de xuño de 2020".
A Deputación Provincial, que dirixe o popular Manuel Baltar, presentou un documento de alegacións, ao que tamén tivo acceso Europa Press, no que, entre outras cuestións, lembra que, de acordo coa orde de "retirar o titular" da nota de prensa orixinal, fíxose e "O PSOE de Ourense en contra dos autónomos" substituíuse por "Rodríguez Villarino en contra dos autónomos".
A institución esgrimiu que non pretendeu "desobedecer" ningunha orde e que entendeu que, como o socialista Rafael Rodríguez Villarino non é candidato ás eleccións" do 12 de xullo, non había intromisión da Deputación "no debate electoral". Ademais, pediu á xunta electoral concretar calquera orde para poder axustarse.
"IGNORAR CON ABSOLUTO DESCARO" A XUNTA
Nun comunicado, os socialistas ourensáns criticaron a actitude de Baltar, ao que acusan de "ignorar con absoluto descaro á autoridade electoral e de seguir incumprindo a lei converténdose nun reincidente".
"Durante os pasados días, ademais de incumprir o requirimento da xunta electoral, Baltar insistiu intencionadamente nestas ilegalidades e publicou na páxina web 'www.depourense.es' novos textos no mesmo sentido que o denunciado e que carecen do caracter institucional que debe concorrer nestes espazos informativos. Así mesmo, as contas en Facebook e Twitter difundiron novamente publicacións con esas mensaxes", engaden os socialistas.
