Os coches volven conquistar parte do paseo marítimo da Coruña peonalizado no estado de alarma

O Concello da Coruña abriu á circulación de vehículos o tramo do carril do paseo marítimo --que peonalizou durante o estado de alarma e que discorre entre as Esclavas e a fonte dos Surfistas-- "debido á alta densidade de tráfico que existe nesta zona do paseo e que estaba provocandoproblemas de circulación na cidade".

A Concellaría de Mobilidade pretende con esta medida "garantir a seguridade das persoas". O resto do carril habilitado durante a pandemia para uso peonil mantense. Así, o tramo entre os Surfistas e o dique de Abrigo seguirá sendo para as persoas viandantes. A restrición para os coches tamén se mantén entre as Esclavas e a zona o Millennium-Portiño.

O persoal responsable da Concellaría de Mobilidade está a estudar distintas actuacións para consolidar este carril para uso dos peóns. Algúns tramos poderían ser utilizados para bicicletas e vehículos de mobilidade persoal, mentres que outros serán reformados para continuar a senda destinada ás corredoras e os corredores, segundo apuntou.

Carril para corredores no paseo marítimo da Coruña. ANDY PEREZ