Por Europa Press / Redacción | SANTIAGO DE COMPOSTELA | 03/07/2020 | Actualizada ás 10:27
O Equipo de Estafas Telemáticas da Coruña procedeu á investigación de tres persoas como presuntas autoras dun delito continuado de estafa, branqueo de capitais e falsificación documental por ofertar cachorros de distintas razas nun portal de obxectos usados e non entregalos tras recibir o importe.
Segundo informou o Instituto Armado, varios veciños das localidades de Miño, Arteixo e Ponteceso denunciaron a venda de cachorros de diversas razas nunha páxina de compravenda de obxectos de segunda man.
Os presuntos estafadores, tras recibir o importe das vendas, nunca realizaban os envíos dos cachorros, momento no que cortaban as comunicacións e daban de baixa as liñas telefónicas "para dificultar a súa identificación", destacou a Benemérita.
Os axentes, no marco da 'Operación Tabor', comprobaron tamén que os investigados, despois de recibir o diñeiro movíano entre distintas contas creadas 'ad hoc' e distintos sistemas de pago, fixéronse coa documentación persoal de terceiras persoas, antigos amigos e coñecidos, para con ela dar de alta liñas telefónicas aos seus nomes, "cometendo así a falsidade documental, co fin de dificultar a identificación real dos autores", sinalaron as mesmas fontes.
Tras finalizar a investigación, os axentes constataron que os investigados tiñan antecedentes por feitos similares e que utilizaba este 'modus operandi' como a súa "fonte de ingresos habitual, polo que se lle pode establecer o carácter de estafadores xenéricos", subliña a Benemérita. As dilixencias instruídas foron remitidas ao xulgado de garda da Coruña.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.