Feijóo xa é Fraga: catro maiorías absolutas nin sequera tronzadas por unha pandemia

O PPdeG amplía os resultados da anterior lexislatura incluso no medio dunha crise sanitaria que parecía poñer nerviosos aos propios integrantes das filas populares.

Por Galicia Confidencial | LUGO | 13/07/2020 | Actualizada ás 00:12

Comparte esta noticia

Feijóo dorme tranquilo unha noite electoral máis logo de revalidar a maioría absoluta no Parlamento galego. Apuntábano algunhas enquisas nos últimos días, mais o escenario era se cadra o máis aberto dos últimos tempos e deixaba oco para unha certa esperanza da esquerda, que vía neste contexto unha oportunidade para facerse cun feixe de deputados e poñerlle fin aos once anos de goberno popular.

Feijóo participa nun acto electoral.. PP DE GALICIA
Feijóo participa nun acto electoral.. PP DE GALICIA

O PPdeG confiaba en que Galicia falase "alto e claro", en palabras de Miguel Tellado, e os resultados axústanse a esas expectativas: 41 escanos, os mesmos ca na última lexislatura. Feijóo non vai polo camiño de ser Fraga. Xa é Fraga. Don Manuel vive hoxe en Alberto, que non leva o 'don' diante pero garda as mesmas formas. "Seguro que estaría orgulloso deste PPdeG", dixo, na súa memoria.

Igual ca o 'león de Vilalba', o dos Peares encadea un cuarto mandato con maiorías amplas e eríxese coma o sostén dun Partido Popular español que esgaza co modelo de Pablo Casado. "Bríndolle este triunfo a todo o PP estatal", dicíalles o candidato reelecto nunha chiscadela pola unión. 

Non só iso. A nova vitoria de Alberto Núñez Feijóo chega no medio dunha pandemia e malia o foco de coronavirus que afecta A Mariña. Pouco importaron estes factores, que mesmo parecían amedrentar as filas populares, cargadas de nerviosismo nos últimos días ao pensar como a crise sanitaria podería poñer en xogo a participación dos máis maiores. 

Pouco importaron, diciamos, porque os resultados volven ser de gusto para o PP. Incluso pode que máis satisfactorios do que eles mesmos agardaban. "Este enorme apoio ilusióname máis ca o primeiro día", sostiña o líder do PP. A continuación da dereita á fronte da Xunta tronza a alegría comedida da esquerda nacionalista, que sobe con forza coma naquel 1997 que agora nos vén á cabeza con este Parlamento tricolor.

A enquisa de GFK para a CRTVG deixaba no aire a maioría de Feijóo e abría a porta a un goberno encabezado por Ana Pontón. Que se lle pasaría pola cabeza a este 'O Noso Presidente' ao ver tales datos? No caso de poñerse tenso, pouco lle durou o disgusto. Axiña soaba o 'One more time' tan significativo no Hotel Eurostars, onde se xuntou o equipo. "Síntome con máis forza ca nunca", confesaba visiblemente satisfeito, mentres lle deu por contar anécdotas con tintes futbolísticos e moito protagonismo da súa familia.

Remataba a súa intervención co seu lema de campaña: 'Galicia, Galicia, Galicia', e engadía unha cuarta 'Galicia' coma quen fía unha nova lexislatura que desexaba como auga de maio. Aí está: Feijóo volve durmir tranquilo. Quedan en vela o resto.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 2 comentarios

2 Galahaz

O problema é quen non hai quen lle dispute os votos do centro galeguista ao PP. Elección tras elección só asistimos a transvases de voto entre a esquerda. E así é imposible. Remítome á análise que fixen nos comentarios dun artigo deste mesmo medio hai 4 anos, tras as eleccións de 2016: http://www.galiciaconfidencial.com/...

1 Ana

E peor que Fraga. Con Fraga tiñamos caixas propias e a situacion da lingua estaba mellor. Con Feijoo temos emigracion, peche de empresas e os nosos recursos marchan fora sen que podamos beneficiarnos ninsequera dunha "tarifa electrica galega" a pesar de ser unha das comunidades que mais produce enerxia ( eolica e hidraulica). Esto para min e indignante, pois temos dereito a beneficiarnos dos nosos recursos para poder ter industria e traballar na nosa terra. Os madrileños beneficianse de ser a capital, os catalans da sua situacion xeografica (fronteira con Francia), os vascos do concerto economico, os sur de ter Sol... e nos non podemos beneficiarnos de producir enerxia. Galegos, ¿Pq permitides isto votando a forzas politicas estatais?.