A Xunta esixe ao Goberno medidas específicas para actuar en destinos turísticos con rebrotes da COVID
A ministra Reyes Maroto propuxo ás comunidades a posibilidade de colaborar na posta en marcha de plans de sustentabilidade turística centrados en destinos pioneiros xa consolidados e en territorios rurais e do interior.
Por E.P. | SANTIAGO DE COMPOSTELA | 13/07/2020 | Actualizada ás 17:00
O conselleiro de Cultura e Turismo en funcións, Román Rodríguez, pediu este luns ao Goberno central que se articulen medidas "específicas" para destinos turísticos afectados por rebrotes da COVID-19.
Fíxoo no marco dunha reunión telemática da Conferencia Sectoral do ramo, presidida pola ministra de Industria, Reyes Maroto, na que subliñou a importancia de contar con instrumentos que "reduzan o impacto" da crise sanitaria en territorios como A Mariña lucense.
Durante o encontro, Román Rodríguez trasladou á ministra a situación de "incerteza" que viven as empresas do sector turístico na costa lucense e nas comarcas limítrofes, sobre todo cando "comezaban a recuperar a súa actividade" tras o fin do estado de alarma.
Por iso, reclamou "accións de promoción específicas" para estes territorios afectados por brotes, o que permitiría aplacar os prexuízos causados á imaxe destes destinos.
Do mesmo xeito, Román Rodríguez valorou a creación dun fondo específico de apoio ás empresas e pemes das zonas máis afectadas, co obxectivo de garantir medidas de protección para empregadores e empregados. Tamén incidiu na importancia de establecer protocolos nacionais que permitan actuar con axilidade e coordinación ante a COVID-19.
No marco do encontro, a ministra propuxo ás comunidades a posibilidade de colaborar na posta en marcha de plans de sustentabilidade turística centrados en destinos pioneiros xa consolidados e en territorios rurais e do interior. Román Rodríguez mostrou a disposición de Galicia a participar nesta iniciativa e comprometeuse a abordalo coas entidades locais daqueles territorios potencialmente receptores destes plans.
REBAIXA DO IVE TURÍSTICO
O responsable de Cultura e Turismo en funcións subliñou tamén a importancia de seguir avanzando na recuperación e reactivación do sector turístico baseándose nos alicerces da seguridade, a calidade e a sustentabilidade. Neste sentido, insistiu na necesidade de rebaixar o IVE turístico, incentivando a demanda e contribuíndo a reactivar o consumo.
Román Rodríguez lembrou a aposta do Goberno galego por promover Galicia como "destino fiable e de calidade" a través do programa 'Galicia destino seguro'. Esta liña de acción, dotada con 8 millóns de euros, recolle unha batería de accións de apoio ás empresas, asesoramento, información e formación.
