A construción en madeira recibirá apoios dentro do desenvolvemento da "bioeconomía"
A última liña destínase a obras de reforma ou acondicionamento de locais comerciais de negocio con produtos de madeira.
Por E.P. | SANTIAGO DE COMPOSTELA | 19/07/2020 | Actualizada ás 13:41
A Xunta convocou unhas axudas dotadas con 1,7 millóns de euros e coas que prevé mobilizar ata 9 millóns para fomentar a construción e o desenvolvemento de produtos, proxectos e obras en madeira.
O Goberno galego indicou nun comunicado este domingo que espera promover un total de 170 iniciativas con estes fondos, que se dividirán en catro liñas de axudas para empresas, microempresas, autónomos e persoas físicas.
En concreto, a Consellería de Economía, Emprego e Industria ofrece axudas para a redacción de proxectos de execución de construción nova, rehabilitación de naves e establecementos de negocio que usen produtos de madeira como elementos estruturais.
Outra das liñas destínase a proxectos para o desenvolvemento e fabricación de envases embalaxes e expositores de madeira e unha terceira céntrase na redacción de proxectos de execución de novas vivendas unifamiliares ou rehabilitación e reconstrución.
A última liña destínase a obras de reforma ou acondicionamento de locais comerciais de negocio con produtos de madeira.
As axudas, que se concenderán en réxime de concorrencia competitiva, cubrirán ata o 80 por cento do importe, cun máximo de 25.600 euros na primeira liña; de 12.000 na segunda; de 16.000 na terceira e de 20.000 na última.
O prazo para pedir as axudas estenderase ata o 30 de setembro, salvo que se esgote o crédito antes, explicou a Xunta, que indicou que o seu obxectivo é promover a "bioeconomía", co uso da madeira, que é un material de orixe natural, reciclable e reutilizable.
