Reclaman "cambios de calado e non só de boca para fóra" para mellorar a atención primaria tras a pandemia
A Asociación Galega para a Defensa da Sanidade Pública advirte de que, tras a pandemia, non se está reorientando "o esforzo para a recuperación do sistema sanitario público".
Por Europa Press / Redacción | Santiago de Compostela | 07/09/2020 | Actualizada ás 17:40
Membros da Asociación Galega para a Defensa da Sanidade Pública reclaman "cambios de calado e non só de boca para fóra" para mellorar a atención primaria tras a pandemia. En concreto, os médicos Manuel Martín e Xosé María Dios asinan un documento no que advirten da necesidade de que haxa "unha forte presión social e profesional" para conseguir estes cambios, á luz dos "problemas que vén arrastrando" a atención primaria "desde hai moito tempo".
Pola súa banda, propoñen medidas como o incremento "urxente" do orzamento sanitario ("o obxectivo sería alcanzar o 25% do orzamento en cinco anos", din), máis contratación e "acabar coa precariedade laboral" do persoal, un aumento da responsabilidade dos profesionais da atención primaria con "novas funcións" como a vixilancia epidemiolóxica" e a mellora da coordinación co resto de servizos.
Tamén expoñen o desenvolvemento do "modelo comunitario", "acabar" coas listas de espera e "optimizar de maneira inmediata as conclusións do Consello Técnico de Atención Primaria de Galicia".
No escrito, advirten de que, tras a pandemia, non se está reorientando "o esforzo para a recuperación do sistema sanitario público".
