Seguen aumentando os mortos con Covid-19 en Galicia, que suma xa 686 vítimas tras cinco novos falecementos

As vítimas da pandemia do coronavirus subiron a 686 en Galicia despois de que nas últimas horas falecesen cinco persoas diagnosticadas de COVID-19, das cales dúas eran usuarias de residencias de maiores. Todas contaban con patoloxías previas.

A morte , elevou a 686 o cómputo total de vítimas que deixa a pandemia do coronavirus en Galicia.

En concreto, segundo informan fontes sanitarias, catro destas mortes rexistráronse en Lugo. Correspóndense cunha muller de 95 anos diagnosticada de Covid-19 no Hospital Polusa, outra de 82 anos procedente da residencia DomusVi Lugo, en Outeiro de Rei; un home de 77 anos usuario do xeriátrico do Incio; e unha muller de 87 que non tiña vinculación con ningún centro.

Ademais, Sanidade notificou a morte dunha muller de 95 anos que permanecía ingresada con coronavirus no Complexo Hospitalario Universitario de Vigo (Chuvi).

Desde o comezo da 'nova normalidade', o número de pacientes falecidos coa enfermidade en Galicia é de 66 persoas, tras a morte dunha muller o 7 de agosto. Antes diso, Galicia encadeara case dous meses --desde o 10 de xuño-- sen decesos relacionados co coronavirus.

Neste contexto, o maior balance de falecidos dos últimos meses notificouse o pasado mércores, cando Sanidade informou dun total de sete. A última vez que se superou esta cifra foi o pasado 5 de maio, con nove decesos.

CONTAXIOS

Galicia detectou 236 novos positivos por COVID-19 nas últimas 24 horas, unha cifra similar aos contaxios notificados o sábado, aínda que cun leve descenso de cinco. En canto aos casos activos, reducíronse en 55, ata os 4.281.

Segundo os datos feitos públicos este domingo pola Consellería de Sanidade, con cifras actualizadas a última hora do sábado, o número de persoas curadas aumentou nun día en 289, ata o total de 15.222 desde o inicio da pandemia.

Ademais, as mortes subiron en dúas con respecto ao parte ofrecido este sábado, polo que as vítimas mortais que deixa o coronavirus en Galicia son un total de 681. Os últimos falecementos, notificados na tarde do sábado, correspóndense con dous homes, de 75 e 87 anos, que estaban ingresados no Hospital de Verín.

Por áreas sanitarias, tan só tres rexistran ascensos no total de casos activos. A de Pontevedra é a que máis sobe, con 31 novas persoas infectadas que pon o total en 470. Tamén aumentan os casos activos, aínda que lixeiramente, na área de Ferrol, ata 184 (+4), e na de Vigo, ata 366 (+3).

En canto ao resto, todas anotan descensos nos contaxiados de coronavirus. A Coruña continúa acumulando a maior cantidade, un total de 1.304 casos activos, pero baixan en 36 con respecto a este sábado. Ademais, descenden en Lugo, ata 814 (-34); en Ourense, ata 473 (-13); e en Santiago, ata 670 casos activos (-9).

Así mesmo, Sanidade notificou este domingo que o número de PCR realizadas ata o momento en Galicia desde o inicio da pandemia é de 394.634, o que significa que en 24 fixéronse un total de 5.026 probas.

RESIDENCIAS

As residencias de maiores galegas rexistran un total de 321 casos activos de COVID-19, dos que 236 correspóndense con usuarios --baixan en 14-- e outros 85, con traballadores --soben en oito, todos eles detectados na residencia do Incio (Lugo)--.

Segundo a actualización ofrecida este domingo polas consellerías de Sanidade e Política Social, con datos de última hora do sábado, os infectados en xeriátricos galegos baixan tras as altas de 16 usuarios da residencia do Incio, recentemente intervida pola Xunta. Con todo, a detección dun novo caso entre os internos coloca a cifra de contaxiados en 60.

Con todo, como principal foco de COVID-19 nas residencias de maiores galegas mantense a DomusVi Lugo, en Outeiro de Rei, tamén intervida. Neste centro, a detección dun novo caso sitúa o total de anciáns infectados en 142.

A maiores, tamén contan con casos de coronavirus entre os seus usuarios a residencia Orpea Coruña, en Culleredo (26); DomusVi Lalín (5); e as residencias Castro Ribeiras do Lea, en Castro de Rei, Os Gozos, en Pereiro de Aguiar, e a de Arteixo, cun infectado cada unha.

Malia a baixada dos casos totais entre os internos, o parte deste domingo sobe o número de traballadores que deron positivo a 85, sete máis, despois de detectarse oito novos entre o persoal da residencia do Incio. Neste centro, son xa 36 os empregados enfermos de COVID-19, o que o converte no principal foco. Tamén conta cun número importante de traballadores contaxiados a DomusVi Lugo, cun total de 22.

Os centros de atención á discapacidade, pola súa banda, contan con 17 positivos confirmados ata o momento. A maioría de casos déronse na residencia Ricardo Varro de Aspronaga, en Oleiros, con 12 usuarios afectados e 2 traballadores.

O resto de positivos rexístranse na residencia Aspace da Coruña, A Braña na Estrada e Juan Vidán Torres de Santiago, cun positivo entre empregados en cada unha.