Educación cede ás presións dos institutos e anuncia agora que contratará 847 profesores máis
A Xunta inclúe unha nova modificación do protocolo a poucos días do comezo das aulas.
Por Europa Press / Redacción | SANTIAGO DE COMPOSTELA | 16/09/2020 | Actualizada ás 15:44
Logo de longos episodios de presión por parte de Anpas e Pais, a Consellería de Cultura, Educación e Universidade vén de anunciar que contratará un total de 847 docentes de secundaria para poder cumprir cos desdobres, o distanciamento de alumnos e as diferentes medidas de adaptación nos institutos, de face ao comezo do curso da próxima semana.
Así o anunciou este mércores o conselleiro de Educación, Román Rodríguez, nunha rolda de prensa posterior á reunión do comité clínico que, entre outras cuestións, actualizou os protocolos de volta ás aulas e aprobou dous novos documentos específicos para comedores escolares e atención á diversidade.
En ESO, Bacharelato e FP, contrataranse 260 por incremento da oferta educativa e 847 para cumprir coas directrices de seguridade relacionadas coa pandemia. En Infantil e Primaria, pola súa banda, xa se incorporaron a semana pasada os 240 novos docentes para o desdobre de aulas, así como 543 novos profesores de apoio --221 para primaria e 322 para ESO-- contratados a través do programa de reforzo educativo Arco.
"É obvio que aquí hai un enorme esforzo dos profesionais e orzamentario da sociedade galega para poder facer fronte a esta situación", sinalou Rodríguez, quen agradeceu "o traballo intenso, constante e duro" que están a levar a cabo os equipos directivos e os servizos de inspección, "avaliando centro a centro e aula a aula" para conseguir espazos con garantías sanitarias.
A incorporación destes docentes será "inmediata" e xa comezaron os chamamentos, polo que estarán incorporados a próxima semana nos seus respectivos centros. Uns 360 centros coñecen as cifras definitivas nestes momentos e o venres adxudicaranse xa os destinos finais, para que poidan ordenar os horarios e planificar a actividade.
BIOMBOS, PARA CASOS "CONCRETOS"
O comité clínico tamén aprobou unha nova modificación das instrucións de seguridade e de saúde a poucos días do comezo das aulas para os centros educativos aprobadas o pasado 31 de agosto, para incluír a posibilidade de optar pola formación semipresencial a partir de bacharelato e a autorización para reducir a distancia entre alumnos por baixo dos 1,5 metros se se instalan biombos na aula, ademais de actualizar diversos aforamentos que se contemplaban na resolución conxunta.
Rodríguez insistiu en que estas medidas se dedicarán a "dar solución a problemáticas específicas" e problemas para realizar desdobres debido ás dimensións dos espazos, e contan co aval dos expertos do comité clínico. Neste sentido, está a prepararse a dotación de biombos protectores para os casos concretos nos que se necesite e un plan de continxencia orientado ao ensino non presencial, que se presentará "de modo inmediato".
DOUS NOVOS PROTOCOLOS
O comité clínico tamén aprobou dous novos protocolos que desenvolven cuestións e áreas específicas das instrucións de inicio de curso. Un deles refírese a a atención á diversidade, con 20 medidas que facilitarán o retorno ás aulas dos alumnos con necesidades especiais "coas máximas garantías" e que recolle as achegas dunha trintena de entidades do sector.
Finalmente, valorouse o protocolo de comedores escolares, "unha demanda dos colectivos de pais e nais" e que inclúe medidas xa coñecida, como o asento fixo durante todo o curso ou a distancia de seguridade ademais doutras cuestións desde a perspectiva sanitaria para garantir o servizo "con normalidade".
