Denuncian "insuficiencias" nos centros de atención da muller en Galicia
A Fegamp realizará un estudo para coñecer a situación dos 82 centros existentes.
Por Europa Press / Redacción | SANTIAGO DE COMPOSTELA | 18/09/2020 | Actualizada ás 12:03
A Federación Galega de Municipios e Provincias (Fegamp) levará a cabo un estudo para coñecer a situación na que se atopan os 82 centros que compoñen da rede de Centros de Atención á Muller (CIM), que se atopan "desbordados" e "mal distribuídos" pola xeografía galega, segundo denuncian os profesionais deste servizo.
Este venres, o presidente da Fegamp e alcalde de Vilagarcía, Alberto Varela, mantivo un encontro coa presidenta de ASOCIM, Montserrat González, quen lle trasladou a necesidade de acometer cambios para suplir as carencias que padecen estes centros.
Así, segundo recolle un comunicado emitido tras o encontro pola Fegamp, a asociación denuncia que os 82 centros de atención que hai Galicia son "insuficientes" e están "mal distribuídos", xa que as provincias de Ourense e Lugo "non suman nin un terzo" do total, o que ocasiona que "numerosas" mulleres teñan que desprazarse "longas distancias".
A presidenta da asociación tamén puxo o foco nas carencias de persoal e que levan, en ocasións, a que a "atención que está a prestar a psicóloga ou avogada tense que interromper frecuentemente para cuestións que podería facer un administrativo como atender o teléfono ou abrir a porta".
Así as cousas, a Fegamp comprometeuse a estudar a situación dos centros a través dun "estudo cualitativo e cuantitativo", ademais da instar á Xunta a traballar "de forma conxunta" para mellorar o sistema.
ACOLLIDA VÍTIMAS DE VIOLENCIA DE XÉNERO EN FERROL
Por outra banda, a Deputación da Coruña triplicará este ano o investimento destinado á casa de acollida a vítimas de violencia de xénero do Concello de Ferrol, que pasa de 32.569 euros do exercicio anterior a 100.891,64 euros.
Así se recolle no convenio subscrito entre o presidente do ente provincial, Valentín González Formoso; o alcalde de Ferrol, Ángel Mato, e a deputada de Igualdade, María Muíño, polo que o organismo provincial achega o 26,43% do orzamento anual de mantemento deste centro que dá atención ás vítimas e aos menores dependentes delas desde o ano 1986.
