Case 80 hectáreas afectadas en dous lumes en Boiro e Carballeda de Valdeorras

O incendio forestal rexistrado na parroquia de Cures, no concello coruñés de Boiro quedou extinguido tras afectar a 37,98 hectáreas e o da parroquia de Casaio, no municipio ourensán de Carballeda de Valdeorras, está controlado. Así, o incendio de Boiro, que comezou o xoves ás 23.59 horas, quedou extinguido ás 19.45 horas deste sábado e as hectáreas calcinadas son de monte raso. Para facer fronte á súa extinción a Consellería do Medio Rural mobilizou a 14 axentes, 20 brigadas, 11 motobombas, dúas pas e dous helicópteros.

Pola súa banda, o que afecta á parroquia de Casaio, no municipio ourensán de Carballeda de Valdeorras está controlado desde as 18.20 horas deste sábado. O lume comezou o venres ás 06.16 horas e, segundo as últimas estimacións provisionais, afecta a unha superficie de 40 hectáreas. Os medios mobilizados para facer fronte ás chamas son: dous técnicos, nove axentes, 19 brigadas, nove motobombas, unha pa, dúas unidades técnicas de apoio, oito helicópteros e un avión.

INTENCIONALIDADE EN MONFORTE DE LEMOS

Por outra banda, a Consellería do Medio Rural deu por extinguido un incendio no municipio lucense de Monforte de Lemas, nas parroquias de Seoane e San Xiao de Tor. Segundo explicaron fontes do Medio Rural, o lume empezou ao redor das 18.30 horas deste sábado en catro puntos case simultáneos, "o que apunta cara a unha clara intencionalidade".

Con todo, os lumes foron extinguidos sobre as 22.00 horas e afectaron a unha superficie de 1,7 hectáreas. Na extinción traballou un técnico, nove axentes, 12 brigadas, nove motobombas, unha pa, catro helicópteros e dous avións. É o segundo lume destas circunstancias que se produce en Monforte.