Por E.P. | A CORUÑA | 24/09/2020 | Actualizada ás 17:39
O concelleiro Xiao Varela, membro do grupo municipal de Marea Atlántica e responsable da área de Rexeneración Urbana no anterior mandato, comunicou este xoves a súa decisión de abandonar a súa acta no Concello da Coruña e retomar a súa actividade profesional.
"Foi un privilexio e un pracer traballar nos últimos anos na mellora da Coruña", sinala na súa conta de Twitter en relación a unha decisión, que confirmaron tamén desde Marea Atlántica. En concreto, desde esta formación ratifican que o pleno de outubro será o último no que Xiao Varela estea presente.
Desde o grupo municipal, e desde Marea Atlántica, lamentan esta decisión e trasladan o seu agradecemento a Xiao Varela, ao que cualifican como "unha figura clave" no anterior mandato, ademais de resaltar a súa "maneira de entender" as políticas urbanísticas.
COALICIÓN CO PSOE
Sobre a etapa de goberno con Xulio Ferreiro á fronte da Alcaldía, Xiao Varela admite "moitos acertos e algúns erros" cunha oposición "deshonesta" e nun contexto "paralizante" que non permitiu, recoñece, "cumprir coas enormes expectativas xeradas".
Tras as últimas eleccións, asegura que defendeu "sen éxito" na organización de Marea Atlántica "a necesidade de tentar un goberno de coalición co PSOE". "Por pensar que era a mellor maneira de dar continuidade ás políticas que estabamos a levar a cabo e porque me parecía a única maneira de evitar unha deriva conservadora do PSOE, que desgraciadamente se confirma".
Por outra banda, argumenta que, ao seu xuízo, a situación actual no pleno "camiña cara a un escenario de confrontación entre as forzas progresistas", das que culpa "en gran medida" ao actual goberno. Tras catro anos no goberno e 15 meses na oposición, afirma que entende que "o mellor é non continuar" e retomar de novo a súa actividade como "arquitecto e urbanista".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.