Feijóo só promete "estudar" a reposición da atención pediátrica suprimida en Bande pola covid-19
Os usuarios deste servizo teñen que desprazarse a Celanova.
Por Europa Press / Redacción | Santiago de Compostela | 28/09/2020 | Actualizada ás 19:12
O presidente da Xunta, Alberto Núñez Feijóo, comprometeuse coa alcaldesa de Bande (Ourense), Sandra Quintas, a "estudar" a posibilidade de volver repor a atención pediátrica, que era dunha vez á semana neste municipio, e que foi suprimida durante a crise do coronavirus.
Feijóo despachou este luns coa alcaldesa deste municipio ourensán, de algo máis de 1.500 habitantes censados. Nos asuntos tratados, segundo informa a Xunta, o presidente e a alcaldesa analizaron a atención pediátrica, que se suprimiu "temporalmente" durante a pandemia covid-19, o que fai que os usuarios se teñan que desprazar a Celanova.
Feijóo e Quintas "coincidiron na necesidade de estudar que o servizo de atención pediátrica", que se prestaba un día á semana, "volva funcionar con normalidade" no Punto de Atención Continuada (PAC) de Bande.
