A familia de Diego Bello: "é unha pena que se te matan fóra do teu país ninguén vaia a facer nada por ti"

A familia de Diego Bello, morto a disparos da policía de Filipinas en xaneiro deste ano nunha operación antidroga, mantivo un encontro este xoves coa valedora do Pobo, Dolores Fernández Galiño, para pedir que a institución interceda ante as administracións autonómica e estatal e que estas forcen ás autoridades filipinas a esclarecer os feitos que rodean o falecemento do coruñés fai dez meses.

"Que o goberno entenda que non nos imos a cansar. Imos seguir tocando todas as portas posibles", aseverou en declaracións aos medios ante a porta do Valedor do Pobo Rebeca Díaz, amiga de Diego Belo que este xoves exerceu como portavoz da familia.

Díaz manifestou o descontento de familia e achegados co trato recibido por parte das autoridades españolas, ás que acusan de evadirse das súas responsabilidades diplomáticas ante a morte en circunstancias controvertidas dun dos seus cidadáns.

A familia escúdase na falta de probas achegadas polo Goberno filipino para acusar a Diego Bello de ser narcotraficante e no informe elaborado pola Comisión de Dereitos Humanos en Filipinas que sostén que os dereitos humanos do coruñés foron vulnerados. "España ten que ter claro que o que lle pasou a Diego pódelle pasar a calquera e é unha pena que se che matan fóra do teu país ninguén vaia a facer nada por tí", manifestou Rebeca Díaz, que incidiu na necesidade de que o Estado español actúe ante as conclusións do informe de Dereitos Humanos.

Deste xeito, os allegos do coruñés falecido en xaneiro aseguran que o Estado se limita a indicarlles que a lei internacional non lles permite investigar o sucedido e a recomendarlles que deben ser eles quen presenten unha denuncia na xustiza filipina. Unha acción que a familia está disposta a adoptar, pero reclama o apoio e asesoramento do Goberno español ante as posibles dificultades que poida carrexar un proceso que, neste caso, implica ás autoridades do país.

"Se moitas veces aquí non sabes de quen te podes fiar, imaxína alí", subliñou Rebeca Díaz, que se preguntou "que avogado se atrevería" a presentar unha denuncia en Filipinas contra o goberno do país.

Familiares e achegados de Diego Belo ás portas do Valedor do Pobo antes de reunirse coa titular da institución, María Dores Fernández Galiño | Fonte: Europa Press