Un libro con 70 documentos e fotografías recolle os "momentos inesquecibles" de Lorca en Compostela
Henrique Alvarellos é o autor desta obra na que se relatan feitos "descoñecidos" até agora.
Por Europa Press / Redacción | Santiago de Compostela | 10/10/2020 | Actualizada ás 11:04
Henrique Alvarellos (Lugo, 1968) presenta este sábado (20,00 horas, Hotel Compostela) na capital de Galicia o seu libro 'Federico García Lorca en Santiago de Compostela', no que recolle os "momentos inesquecibles" do poeta granadino durante o seu paso pola cidade.
A obra é un volume ilustrado con máis de 70 documentos e fotografías do paso de Lorca por Compostela, que recolle anécdotas e testemuños, "moitos deles descoñecidos".
Con 18 anos, en 1916, Lorca descobre a cidade nunha viaxe de estudos por Galicia. "Isto hipnotízame", escribiu por aquel entón. Despois regresou tres veces máis a Santiago, todas en 1932 como conferenciante, poeta e director da Barraca.
Alí, foi arroupado e agasallado con admiración por toda unha xeración de estudantes e intelectuais con ansias de "cultura, galeguismo e liberdade" durante a Segunda República.
No libro escrito por Alvarellos apúntase que Lorca deu a coñecer en Santiago algúns dos versos inéditos de 'Poeta en Nova York', á vez que debuxa, canta e toca o piano no Hotel Compostela. Ademais de ser retratado por Carlos Maside e Luís Seoane, do seu paso por Compostela sairá á luz 'Seis poemas galegos'.
Así mesmo, este libro conta co trazado da primeira ruta lorquiana pola cidade con 14 lugares imprescindibles.
