Por Europa Press / Redacción | SANTIAGO DE COMPOSTELA | 14/10/2020 | Actualizada ás 14:16
O deputado do BNG no Congreso, Néstor Rego, rexistrou unha proposición non de lei na que insta o Goberno central a "executar a sentenza" do xulgado de primeira instancia da Coruña pola que se fallou que o Pazo de Meirás pertence ao patrimonio público. Ademais, reclamou que, unha vez que se dea este paso, sexa transferido a Galicia.
Esta iniciativa súmase á reclamación que o Parlamento de Galicia, que o pasado venres se situou unanimemente a favor de que se execute a sentenza. Ademais, o PPdeG rexistrou unha proposición non de lei que fará que a Cámara autonómica vote a favor de reclamar ao Estado "a cesión da xestión" do Pazo de Meirás para a administración autonómica.
Neste sentido, o deputado do BNG no Congreso pide ao Goberno central que, unha vez que o Pazo de Meirás estea en mans do Patrimonio do Estado, "inicie de forma inmediata" o proceso de transferencia a Galicia. O deputado nacionalista lembrou que é a primeira vez que unha sentenza "recoñece que as actuacións para a entrega" deste ben a Francisco Franco "foron realizadas de forma ilegal e nun contexto de extorsión e terror". A sentenza declara "non válida a venda simulada coa que os herdeiros do ditador acreditaban a posesión" desta propiedade.
"FEITO HISTÓRICO"
"Estamos ante un feito histórico, cargado de gran simbolismo e relevancia", destacou Rego, que salientou que a reclamación maioritaria do país "é que o pazo pertence ao pobo galego" e "iso significa que ten que estar nas mans de institucións galegas".
"O Goberno debe reclamar xa a execución provisional co obxectivo de restituír a propiedade ao patrimonio público, velar pola integridade doutros bens tamén resultado do espolio e que alí están depositadas e garantir a súa apertura e o aproveitamento como espazo histórico", manifestou Rego, quen citou, entre elas, as estatuas de Isaac e Abraham do Pórtico da Gloria ou a biblioteca de Emilia Pardo Bazán.
O deputado do BNG subliñou, así mesmo, que a formación nacionalista "continuará traballando ata conseguir a restitución de todo o patrimonio roubado por Francisco Franco e que aínda está retido pola familia". "Non é só unha cuestión de xustiza, senón tamén de dignidade e de obrigación moral con todas as vítimas do franquismo", sentenciou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.