Ferrol terá un monumento ás vítimas franquistas, a pesar da abstención do PP

Esta homenaxe, que se situará en Canido, parte dunha moción de Ferrol en Común co apoio de PSOE e BNG

Por Europa Press / Redacción | SANTIAGO DE COMPOSTELA | 20/10/2020 | Actualizada ás 14:35

Comparte esta noticia

O pleno do Concello de Ferrol volveu a aprobar este martes a construción dun monumento ás vítimas do franquismo, tras a presentación por segunda vez dun texto promovido polo grupo municipal de Ferrol en Común e que contou cos votos a favor do PSOE, partido no goberno, e o BNG. Pola súa banda, o Partido Popular volveuse a abster.

Dita aprobación produciuse nunha moción debatida desde as 21,30 horas deste luns, 19 de outubro, nun pleno extraordinario e que corresponde á continuación do ordinario do mes de setembro.

Na exposición da moción, o edil de Ferrol en Común Suso Basterrechea lembrou que o 29 de setembro do 2018 xa foi aprobada, "sen ningún voto en contra, a construción dun monumento que recollese a lista de vítimas do franquismo" nas comarcas de Ferrolterra, Eume e Ortegal. Suporía, segundo as súas palabras, "facer un recoñecemento e dignificación das mulleres e homes que loitaron pola liberdade entre os anos 1936 e 1976" nestas zonas.

Basterrechea tamén detallou que este monumento "xa está elixido" e situarase "en Canido, na rúa Navegantes, onde se atopaba o antigo cemiterio e onde xa existe unha placa de recordo, por ser un lugar altamente significativo".

RESTO DE GRUPOS

Na quenda de intervencións, o BNG, a través do seu portavoz, Iván Rivas, mostrou o seu apoio a esta moción, mentres que desde o PSOE foi a edil de Patrimonio Histórico, Eva Martínez, a encargada de confirmar a súa 'si' a esta solicitude. A socialista apuntou que "tras chegar ao goberno" o PSOE tivo "certas dificultades en localizar todo o expediente, que se viu ademais tamén afectado pola situación xerada polo COVID-19".

Pleno de Ferrol
Pleno de Ferrol | Fonte: Europa Press

Por último, o grupo municipal do PP, a través da súa viceportavoz, Martina Aneiros, lembrou que na anterior ocasión de votar sobre este monumento o seu grupo xa se abstivo, en virtude dunha resolución do Parlamento de Galicia referente a este tipo de asuntos. Por iso, reiteraron o seu voto.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta