Baltar defende un 'Plan de Goberno Aberto' para priorizar "transparencia e participación cidadá"

O presidente da Deputación de Ourense, Manuel Baltar, participou este martes na reunión do consello de goberno da Rede de entidades locais pola transparencia e participación da Federación Española de Municipios e Provincias (FEMP), órgano ao que pertence o máximo responsable do goberno provincial ourensán.

Nun comunicado, a Deputación explica que no encontro debateuse sobre o 'IV Plan de Goberno Aberto' das administracións públicas, "a folla de ruta que debe priorizar no próximos catro anos as políticas de transparencia e participación cidadá en España, para que a interacción entre gobernos e sociedade sexa o máis directa e eficaz posible".

Na reunión, celebrada por videoconferencia, tratáronse temas referidos a formación e desenvolvemento económico, "coa finalidade de avanzar en políticas de transparencia, participación e colaboración cidadá máis efectivas para o conxunto de entidades locais, que favorezan unha aceleración do desenvolvemento económico e social dos territorios, máxime tendo en conta a actual crise da covid-19".

Neste contexto, Baltar considera fundamental "reforzar a confianza dos cidadáns nos gobernos locais". "Debemos asumir compromisos de bo goberno e de prácticas exemplares á hora da rendición de contas, como vimos facendo desde hai anos na Deputación de Ourense, que ocupa o primeiro posto no ranking de transparencia dos gobernos provinciais de España, sendo tamén a primeira administración do país en contar cunha área específica de transparencia e goberno aberto", reivindicou.

Manuel Baltar destaca "a importancia e o paso adiante" que supón o 'IV Plan de Goberno Aberto', polo que significa "de proceso participativo e de consenso entre a Administración e a sociedade civil, pois se elabora tendo en conta das demandas cidadás e as dos gobernos a diferente niveis".

Baltar en rolda de prensa.. DEPUTACIÓN DE OURENSE