O PP tomba unha batería de medidas propostas polo PSdeG sobre prevención contra os incendios

A deputada do BNG María González Albert queixouse de que a Xunta marcase para esta campaña o obxectivo de que ardan unhas 17.000 hectáreas, porque é o "recoñecemento explícito dun fracaso".

Por Europa Press / Redacción | SANTIAGO DE COMPOSTELA | 20/10/2020 | Actualizada ás 20:28

Comparte esta noticia

O PPdeG rexeitou unha moción do PSdeG --apoiada polo Bloque-- no pleno do Parlamento galego que presentaba unha batería de medidas contra os incendios, entre as que se atopaba un plan de recuperación de actividade agraria e contra o despoboamento na provincia de Ourense.

Na súa intervención, o deputado socialista Martín Seco reclamou aos populares que "se deixen de tanta propaganda" e aposten polo "cambio de políticas". "Ano tras ano arden os mesmo lugares en Ourense, non podemos resignarnos a que isto sexa así", queixouse.

A iniciativa socialista tamén pedía mellorar a coordinación dos medios de extinción, levar a cabo traballos de prevención de incendios antes de xullo e mellorar os servizos de investigación, entre outras.

Seco referiuse tamén a unha recente entrevista do conselleiro de Medio Rural, José González, na que comprometía unha nova lei de incendios "acordada" en 2021.

Respecto diso, o deputado socialista afeoulle "incumprir" o ditame da comisión de incendios, que fixaba que se debía "refundir" toda a normativa sobre lumes antes de xaneiro de 2019. Así, preguntouse de que servirá esa "lei marabillosa" se "non cumpren as leis" e "non pon orde ao monte".

Así mesmo, require que aposten por "verdadeiras políticas de mobilización de terras" e que "se deixen de tantos escaparates" e "aldeas modelo".

Ademais, Seco espetoulle aos populares: "Vostedes son para as políticas forestais deste país o mesmo que Ana de Bande para as políticas de igualdade".

POSTURA DE BNG E PP

A continuación, a deputada do BNG María González Albert queixouse de que a Xunta marcase para esta campaña o obxectivo de que ardan unhas 17.000 hectáreas, porque é o "recoñecemento explícito dun fracaso". Ademais, critica que "o PP parece dar por perdida a provincia de Ourense".

González Albert censura que o sistema contraincendios da Xunta "fai augas por todas partes", mentres reprocha que "agora o conselleiro vén de descubrir que crear descontinuidades" vai arranxar " todos os problemas", pero pregúntase "quen vai atender esas descontinuidades sen habitantes".

En cambio, José Armada (PP) defendeu a negativa do seu grupo a esta moción por considerar as medidas do PSdeG como "incongruentes", á vez que defendeu que a Xunta puxo en marcha peticións que se inclúen. Pon de exemplo a futura lei de recuperación de terras.

Sobre as palabras de Seco acerca da popular Ana Vázquez Branco, Armada replicou que "o compromiso coa igualdade" do PSOE demóstrao "" ao manter a Pablo Iglesias como vicepresidente con "un agravante por compoñente de xénero" no caso Dina.

REXEITAMENTO A QUE A CULTURA SEXA BEN DE PRIMEIRA NECESIDADE

Noutra orde de cousas, os populares tamén votaron en contra dunha moción do PSdeG --que contou co respaldo do Bloque-- cunha batería de medidas para reactivar ao sector cultural.

O PSOE demandaba declarar a cultura como ben de primeira necesidade, incrementar o gasto público en 2021, presentar un plan plurianual de reactivación, crear unha mesa diálogo permanente, así como establecer protocolos "claros e inequívocos".

A deputada socialista Noa Díaz tachou de "insuficiente" o plan presentado en abril polo Goberno galego, polo que demanda un "balón de osíxeno" para o sector no canto de fixalo todo a un Xacobeo "incerto".

Por iso, Díaz empraza a "aproveitar a crise para un cambio de paradigma de modelo", pois censura que "falta estratexia" por parte da Xunta.

A deputada do BNG Mercedes Queixas chamou a "definir por fin outra política cultural", á vez que alertou do "gran impacto negativo" no sector galego da pandemia. Así, defende que "sobran as razóns" para reclamar que a cultura sexa un ben de primeira necesidade.

En contraposición, José Luís Ferro (PPdeG) defendeu o plan "complexo e ambicioso" de reactivación cultural posto en marchar pola Xunta. "Seguro que ten algúns erros que podemos mellorar entre todos", dixo, e mostrouse "aberto" a "escoitar aos profesionais" para a súa mellora.

"Non se que teima teñen vostedes co Xacobeo, non entendo por que di que as medidas do plan non deben pivotar ao redor do Xacobeo", replicou Ferro a Díaz.

Incendio de Vilariño de Conso en Ourense onde se declarou a situación 2 de emerxencia dada a proximidade do lume a núcleos de poboación. En Vilariño de Conso (Ourense) a 14 de setembro de 2020.. Rosa Veiga - Europa Press - Arquivo
Incendio de Vilariño de Conso en Ourense onde se declarou a situación 2 de emerxencia dada a proximidade do lume a núcleos de poboación. En Vilariño de Conso (Ourense) a 14 de setembro de 2020.. Rosa Veiga - Europa Press - Arquivo | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta