A Xunta convoca os Premios Artesanía de Galicia 2020 para recoñecer a traxectoria e o talento de artesáns galegos

A Xunta publica este luns no Diario Oficial de Galicia a convocatoria dos Premios Artesanía de Galicia 2020, co obxectivo de recoñecer, un ano máis, o talento e a traxectoria de artesáns galegos, así como de impulsar a substitución xeracional no sector.

Como en anos anteriores, dividiranse nas categorías Premio Artesanía de Galicia, Premio Traxectoria e Premio Bolsa Eloy Xesto, e o prazo de presentación de candidaturas estará aberto desde o 16 ata o 27 de novembro.

Estes galardóns teñen como obxectivo principal recoñecer e visibilizar o traballo do sector artesán galego, así como contribuír a divulgar os oficios artesanais, potenciar a creatividade dos profesionais, incentivar os novos talentos en Artesanía de Galicia, promover a substitución xeracional e apostar pola introdución da innovación e do deseño nos procesos de produción.

O Premio Artesanía de Galicia, dotado con 9.000 euros, está dirixido a talleres artesáns inscritos no Rexistro Xeral de Artesanía de Galicia. Premiarase a obra que represente as liñas desexadas para unha artesanía competitiva no mercado actual como son o deseño, a adaptación ou a conservación das técnicas e valores tradicionais máis característicos de Galicia, a incorporación ás tendencias actuais, a innovación e a boa calidade da obra. Poderanse presentar a esta categoría todos os talleres artesáns inscritos no Rexistro Xeral de Artesanía de Galicia.

O Premio Traxectoria ten carácter honorífico e trátase dun premio outorgado polo propio sector. O obxectivo é recoñecer a traxectoria profesional consolidada dun profesional da artesanía galega, a súa contribución á posta en valor e á promoción desta actividade, e a calidade do seu traballo; así como o seu compromiso coa divulgación e coa transmisión pedagóxica dos principais valores positivos no campo da artesanía galega.

Imaxe de Alma da Artesanía