A Xunta destina máis de dezasete millóns para licitar a estación de autobuses da intermodal da Coruña

O Consello da Xunta aprobou este xoves o convenio de colaboración co Ministerio de Transportes e o Concello da Coruña para o desenvolvemento da intermodal, un acordo polo que o Goberno galego licitará e executará a nova estación de autobuses, incluído o aparcadoiro, por un total de 17,4 millóns.

Diso informou este xoves en rolda de prensa o presidente da Xunta, Alberto Núñez Feijóo, que detallou que o orzamento global desta infraestrutura ascende case a 80 millóns de euros.

A Xunta sinalou que este acordo establece o marco de colaboración entre o tres administracións para executar un complexo intermodal que permita o intercambio áxil e seguro entre o autobús e o tren e outros modos de mobilidade sustentable.

Ademais, indicou o proxecto mellorará a permeabilidade transversal da cidade na contorna da estación de ferrocarril de San Cristóbal, optimizando a conexión peonil e ciclista entre os barrios e a conectividade entre a terminal ferroviaria e a nova estación de autobuses.

Neste contexto, a Xunta instou a Adif a axilizar a firma do convenio, xa que servirá de base para a rúbrica doutros acordos máis concretos sobre o financiamento do aparcadoiro ou do proxecto das zonas comúns.

OBRIGACIÓNS DE CADA ADMINISTRACIÓN

No referido a as obrigacións recollidas no documento, a Xunta licitará, executará e financiará a nova estación de autobuses integrada na terminal ferroviaria, que inclúe o aparcadoiro, achegando un investimento de 17,4 millóns.

Para iso, sinalou que xa dispón do proxecto básico da estación e que comezou a redacción do construtivo. Ademais, lembrou que iniciou en febreiro a tramitación urbanística. Deste xeito, prevé que no primeiro trimestre de 2021 poida estar aprobado o proxecto no Consello.

En concreto, a estación de autobuses situarase dentro do recinto actual da terminal ferroviaria, no espazo delimitado ao noroeste pola avenida Sardiñeira e ao sueste polas vías do tren. Constará dun edificio de viaxeiros en contacto coa pasarela de acceso peonil, unha planta baixa para o aparcadoiro de turismos, unha planta intermedia para dársenas e unha cuberta en consonancia coa da terminal ferroviaria.

En relación co Concello da Coruña, o acordo establece que lle corresponde o financiamento do aparcadoiro e a execución dos accesos, coa achega dun orzamento total de 14 millóns.

Deste xeito, a Administración local deberá licitar e executar a remodelación da avenida Sardiñeira e a súa conexión coa de Arteixo, unha intervención que inclúe a reforma da avenida do Ferrocarril, a urbanización da Sardiñeira e a nova vía de conexión desta coa avenida de Arteixo.

En relación con Adif, será da súa competencia a reforma da terminal ferroviaria, cuxas obras, segundo a Xunta, continúan pendentes de licitación, xa que foron anunciadas a mediados de 2019, cun investimento de 48,5 millóns, pero despois atrasouse a súa licitación ata 2021

Ademais, corresponderalle licitar, executar e financiar todas as obras relativas á estación de tren. Tamén deberá acometer a mellora da permeabilidade peonil transversal da cidade nesta contorna, que inclúe unha pasarela sobre a futura praia de vías, así comouna conexión rodada, mediante un paso inferior, entre a avenida do Ferrocarril e o aparcadoiro en superficie da estación.

ABASTECEMENTO DE TEIXEIRO, EN CURTIS

Por outra banda, a Xunta colaborará co Concello de Curtis na mellora do abastecemento de Teixeiro e do polígono industrial, o que suporá un investimento conxunto de 2,7 millóns.

O Consello deu luz verde este xoves á ampliación do convenio de colaboración, polo que a Xunta achegará 2,2 millóns a esta actuación e o Concello de Curtis 500.000 euros.

En concreto, trátase de executar a nova captación de auga para o abastecemento e a ampliación da estación de tratamento de auga potable, que servirá a unha poboación de case 5.200 habitantes no horizonte 2042.

Por último, na súa reunión semanal, o Goberno galego tamén deu o visto e prace á transferencia a favor do Concello do Rosal dun tramo antigo da estrada provincial que comunica Tabagón, A Vila e Portecelo.

Trátase de 290 metros da vía provincial EP-3302, xerado pola rectificación de trazado realizada pola Xunta de Galicia para executar o tramo III da vía de altas prestacións Tui-A Guarda.

CONCELLO DA CORUÑA E GADISA

A alcaldesa da Coruña, Inés Rey, e o presidente de Gadisa, Roberto Tojeiro, asinaron un convenio de colaboración polo que a empresa doará 20.000 euros co fin de impulsar a inclusión social a través do deporte.

Deste xeito, segundo informa o consistorio, Gadisa súmase a dúas edicións máis do programa 'Deporte Solidario e Inclusivo', que impulsa a Fundación Emalcsa "e que busca a igualdade e a inclusión social a través da práctica deportiva".

Nun acto en que tamén participou o director da Fundación Emalcsa, Manuel Aguilar, e a concelleira de Benestar Social, Yoya Neira, a alcaldesa destacou que este programa "busca fomentar o deporte basee como instrumento de intervención social".

"Para integrar colectivos en risco ou en situación de exclusión social, así como difundir os valores asociados ao deporte", engadiu.