A incidencia da COVID en Cabana, Laxe e Malpica duplican a de España con máis de 1.000 casos por 100.000 habitantes

Este foi un dos motivos polos que o comité clínico da Consellería de Sanidade decidiu que toda a comarca de Bergantiños salvo o municipio da Laracha deba pechar a hostalaría e estea confinada perimetralmente desde as 00,00 deste sábado.

Por Europa Press / Redacción | SANTIAGO DE COMPOSTELA | 14/11/2020 | Actualizada ás 12:28

Comparte esta noticia

Os municipios coruñeses de Cabana, Laxe e Malpica contan cunha taxa de incidencia da pandemia da COVID-19 de máis de 1.000 casos por cada 100.000 habitantes detectados nos últimos 14 días, o que supón duplicar a de toda España, que se sitúa ao redor dos 500.

Este foi un dos motivos polos que o comité clínico da Consellería de Sanidade decidiu que toda a comarca de Bergantiños salvo o municipio da Laracha --é dicir, afecta a Cabana, Carballo, Coristanco, Laxe, Malpica e Ponteceso-- deba pechar a hostalaría e estea confinada perimetralmente desde as 00,00 deste sábado. Así mesmo, as reunións sociais quedan restrinxidas a conviventes.

Segundo explica a orde de Sanidade publicada no Diario Oficial de Galicia (DOG), o informe da Dirección Xeral de Saúde Pública do venres indica que a incidencia acumulada a tres, sete e 14 días na comarca de Bergantiños mostra "unha clara tendencia ascendente", mentres que o número reprodutivo instantáneo é superior a 1, "o que indica que segue manténdose a transmisión na comunidade".

De feito, a taxa de incidencia global dos últimos 14 días para toda a comarca é 1,9 veces o do conxunto de Galicia --case o dobre--. A orde do DOG destaca ao concello de Carballo pola súa alta notificación diaria de casos de COVID-19, aínda que a situación máis grave rexístrase nos municipios de Laxe, Cabana e Malpica, con taxas de máis de 1.000 casos por cada 100.000 habitantes. Pola contra, A Laracha mostra a taxa máis baixa, motivo polo cal foi excluído do peche.

Saúde Pública tamén subliña os valores "de risco" que mostra o brote da comarca de Bergantiños, como a porcentaxe de PCR positivas entre os contactos estreitos, ademais do feito de que o grupo de idade coas taxas de contagios máis altas é o de xente nova, o cal "favorece" a transmisión do virus.

RESTRICIÓNS EN RIBADAVIA

Para xustificar as medidas en Ribadavia, que tamén desde este sábado está confinado perimetralmente e ten pechada a súa hostalaría, o informe de Saúde Pública remarca que a incidencia acumulada en toda a comarca do Ribeiro "mostra unha tendencia claramente ascendente" tanto a sete como a 14 días e o número reprodutivo está por encima de 1.

Con todo, este documento céntrase en Ribadavia, con máis de 700 casos por cada 100.000 habitantes, e destaca que aínda que a taxa a 14 días é 2,6 veces a do total de Galicia, a do últimos tres días é 3,4 veces maior, é dicir, máis do triplo. Así mesmo, Saúde Pública asevera que tamén neste municipio as transmisións máis altas detéctanse en xente nova.

Por todos estes motivos, segundo recolle a orde de Sanidade publicada no DOG, Ribadavia elevou o nivel de restricións mentres que o resto da comarca do Ribeiro continúan coas medidas establecidas para o conxunto de Galicia --reunións de ata seis persoas, convivientes ou non, libre mobilidade e a hostalaría aberta pero con reducións de aforamento, entre outras--.

Porto de Malpica de Bergantiños
Porto de Malpica de Bergantiños

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta