Doce cabalos da Policía Nacional colaborarán na prevención de incendios e na seguridade do Camiño este verán

A Subdelegación do Goberno en Pontevedra foi este martes o punto de saída para o despregamento da Unidade de Cabalaría da Policía Nacional na provincia. Neste acto de presentación da Unidade participaron o subdelegado do Goberno, Abel Losada; o comisario-xefe provincial, Juan José Díaz, e do subinspector xefe da Unidade, Julio Serrano.

Esta acción enmárcase no dispositivo do Plan Antiincendios da Xunta de Galicia e tamén dentro das medidas de protección dos peregrinos do Camiño de Santiago. A Unidade confórmana seis cabalos que estarán en Pontevedra para cubrir esta provincia e a de Ourense. Súmanse aos outros seis que están con base en Santiago para atender as provincias da Coruña e Lugo. En total son 20 axentes da Policía Nacional os que están despregados na comunidade, a metade en base norte e a outra na zona sur.

Julio Serrano explicou que traballan en toda Galicia, "desde Viveiro, a zona máis afastada, a zona máis ao norte, ata Ourense, pasando por Lugo, Monforte, Ribeira ou Marín, por suposto". A actividade distribúese de luns a domingo, en quendas de mañá e tarde e, ademais do labor xenérico de seguridade ao Camiño de Santiago e prevención de incendios forestais, responden as demandas da Xefatura Superior de Galicia. Esta semana, estando fóra de servizo, alertaron de dous incendios en Marín e, na zona norte, centraron o seu labor en colaborar na procura de desaparecidos en Lugo.

Respecto diso, o subinspector Serrano explicou que o "labor é primordialmente preventivo e disuasorio, á vez". Abel Losada lembrou que "desde hai anos" lévase a cabo esta colaboración que é "moi apreciada polos propios concellos nos que ten lugar", ademais de resultar "fundamental" nos seus dous labores. Ademais, a Garda Civil tamén conta cunha unidade de cabalaría que fai o propio na súa xurisdición. Esta unidade, procedente da Comisaría Xeral de Seguridade Cidadá en Madrid, estará despregada en Galicia ata o 30 de setembro.

Axentes de Policía Nacional montan dacabalo como medida de seguridade dos peregrinos do Camiño de Santiago | Fonte: Beatriz Ciscar - Arquivo