A Xunta rexeita a "intervención sumarísima" dos centros residenciais privados

A conselleira de Política Social, Fabiola García, asegurou este martes en Lugo que a Xunta de Galicia traballa nun "novo modelo residencial" para as persoas maiores e rexeitou "unha intervención sumarísima" dos centros de titularidade privada. Este compromiso trasladouno tras críticas da oposición, tanto por parte do PSOE como do BNG, ao Goberno galego por non anticiparse aos contaxios nos centros de maiores, a maioría de titularidade privada.

"A Xunta de Galicia vai continuar traballando nese novo modelo residencial de persoas maiores, que é un modelo de residencias perfeccionado e xa estamos a elaborar ese novo modelo e estámolo facendo da man das autoridades sanitarias. Un novo paso neste modelo residencial ten que pasar por unha maior coordinación sociosanitaria", destacou a conselleira.

Neste sentido, incidiu en que nestes momentos "de pandemia sanitaria, que son momentos moi complicados", hai que "pensar en traballar coa oposición (nacionalistas e socialistas) da man para axudar a todas esas persoas maiores". Ademais, apelou á necesidade de "facer eses cribados quincenais, tamén cos traballadores, continuar visitando todas as residencias de Galicia para que teñan ben feitos eses plans de adaptación ou eses plans aplicados a cada un dos centros".

Dito todo isto, Fabiola García afirmou que por parte da Xunta descartan "a intervención sumarísima do cento por cento das residencias de Galicia", porque, abundou, "nestes momentos o 98 por cento das prazas de residencias de persoas maiores están libres de Covid". "O que hai que facer é continuar apoiando as residencias de Galicia, continuar coidando ás persoas maiores e continuar traballando conxuntamente para que todas as persoas maiores poidan saír adiante", concluíu.

A conselleira de Política Social, Fabiola García, nunha visita en Lugo. | Fonte: Europa Press