O BNG ve unha "chapuza xurídica" a nova lei de saúde e pide "reforzar" a sanidade pública

A portavoz nacional do BNG, Ana Pontón, tachou de "chapuza xurídica" a reforma da lei galega de saúde de 2008 presentada esta semana polo PPdeG no Parlamento autonómico co obxectivo de atallar a pandemia do coronavirus, porque incide nas "sancións" e non en "reforzar" o sistema sanitario público.

Nunha rolda de prensa celebrada este sábado tras un Consello Nacional da formación telemático, Pontón lamentou o "recorte de dereitos" que supoñen estas modificacións lexislaturas para os galegos, que mostraron "un comportamento exemplar" durante a pandemia.

"O proxecto de lei de Feijóo é unha chapuza xurídica e trata ás galegas e galegos como sospeitosos habituais aos que hai que vixiar e sancionar. Recorta dereitos fundamentais a través dunha lei ordinaria, obriga a vacinarse baixo pena de multa e ten afán punitivo-sancionador. De feito, o texto repite 71 veces a palabra 'sanción' e prevé multas de ata 600.000 euros", lembrou a xefa da oposición galega.

Pontón tamén lamentou que este texto, que consta de 52 folios, non conteña "ningunha medida para mellorar a sanidade pública en plena pandemia": "O que debería estar a facer Feijóo é reforzar a sanidade pública, non ideando supostos para multar ás familias, sobre todo cando actuaron cumprindo as normas".

Ademais de cuestionar a vacinación obrigatoria cando aínda non está aprobada ningunha vacina, a portavoz nacional do BNG preguntouse se a Xunta "terá capacidade" de administrala á poboación "vendo o que pasou coa campaña da gripe". Así as cousas, Ana Pontón censurou que o presidente da Xunta lance esta proposta lexislativa a través do grupo do PPdeG no Parlamento, "porque sabe que a reforma que pretende non superaría a proba do algodón xurídico, nin aprobaría os informes xurídicos preceptivos" se partise do propio Goberno galego.

PIDE "MEDIDAS MÁIS DRÁSTICAS"

Durante a quenda de preguntas dos medios, a líder nacionalista reclamou "medidas máis drásticas" para conter a pandemia na Comunidade: "Que se tomen canto antes, porque estariamos a salvar vidas e afectando nunha menor medida á economía".

Isto sería, dixo posteriormente, "a mellor maneira" de que haxa un Nadal "dentro de certa normalidade", aínda que apostou por pór a súa mirada máis aló: "Hai que ver que pasa no inverno, que pasa en xaneiro, en febreiro e en marzo. E o Goberno galego é quen ten que anticiparse e pór sobre a mesa medidas". Así mesmo, Pontón criticou que Feijóo poña "a sanción como solución" cando "seguramente" a incidencia da covid-19 en Galicia sería menor se houbese "rastreadores suficientes".

"E se se optase por intervir todas as residencias, hoxe teriamos unha blindaxe nun dos aspectos máis delicados nesta crise. Ou se se optase por reforzar a Atención Primaria, teriamos garantido o control da pandemia e estariamos a evitar un problema que nos preocupa moito: está a atrasarse a atención sanitaria a persoas que teñen patoloxías non covid", explicou Pontón a continuación.

"IMPROVISACIÓN" DA XUNTA

Outra mostra de "improvisación", a xuízo da portavoz nacional do BNG, foi o peche da hostalaría decretado hai dúas semanas nun total de 60 concellos --desde este sábado, son xa 69-- "sen ter un plan de axudas" para o sector, algo que se presentou con posterioridade e que é "suficiente".

Por iso mesmo, dixo que os nacionalistas rexistrarán no Parlamento galego unha moción para pedir "un verdadeiro rescate" para sectores afectados pola pandemia. Segundo cifras que puxo encima da mesa, debería estar dotado con 30 millóns de euros "como mínimo" en axudas directas, ademais dun "plan ambicioso" por 200 millóns que supoña "unha aposta por reflotar" estes sectores e "protexer" aos seus traballadores.

ORZAMENTO DA XUNTA

A portavoz nacional do BNG tamén criticou a "oportunidade perdida" para a recuperación de Galicia que supón os orzamentos da Xunta para 2021 aprobados este venres polo Goberno de Alberto Núñez Feijóo, que ascenden a uns 11.664 millóns de euros. Feijóo "volve optar pola propaganda" e polos mesmos titulares que todos os anos", cunhas contas que só serven para o "autobombo".

"Non hai estratexia para sacar Galicia da crise e tampouco hai vontade para tecer un gran acordo de país para, no seo da comision de reactivación do Parlamento, poñer en marcha medidas de alcance no único momento que imos ter fondos extraordinarios para reactivar a economía", explicou.