O Congreso pide unha investigación imparcial sobre a morte de Diego Bello en Filipinas
A iniciativa aprobada recoñece que hai moitas "dúbidas" sobre o que aconteceu realmente.
Por E.P. | MADRID | 23/11/2020 | Actualizada ás 22:17
A Comisión de Asuntos Exteriores do Congreso dos Deputados aprobou este luns por unanimidade unha Proposición Non de Lei (PNL) na que insta o Goberno a pedir a Filipinas unha investigación imparcial sobre a morte do español Diego Bello tras recibir seis disparos en xaneiro de 2020 na illa de Siargao.
A PNL pide ao Goberno que se solicite ás autoridades filipinas, "en aras da relación de amizade e cooperación diplomática", promover unha investigación imparcial que permita esclarecer as circunstancias da morte do mozo coruñés, "determinando a identidade e paradoiro dos presuntos autores dos disparos e establecendo medidas cautelares que eviten a súa posible fuga antes dun eventual xuízo".
Así mesmo, solicítase a Filipinas toda a documentación xudicial da que puidese dispor relativa a este suceso, tanto a previa intervención policial que lle causou a morte como a posterior á mesma, resultado da investigación realizada.
O texto defendido pola deputada do PP Valentina Martínez expón as "numerosos dúbidas" que persisten dez meses despois do asasinato sobre as circunstancias nas que se produciu o falecemento, que segundo as autoridades filipinas ocorreu no marco dunha operación antidroga.
