Por E.P. | SANTIAGO DE COMPOSTELA | 29/11/2020 | Actualizada ás 12:18
A Audiencia Provincial de Ourense xulgará o vindeiro xoves, día 3, a un home acusado de entrar pola forza a roubar nunha vivenda e agredir á súa propietaria, á que atou e amordazou.
Segundo recolle o escrito de acusación, os feitos remóntanse a novembro de 2011, cando o acusado, en compañía doutro home non identificado, entrou na vivenda da muller coa intención de roubar.
Ao ser sorprendidos pola propietaria, o acusado e o seu acompañante abordárona, tirárona ao chan e a amordazárona cunha venda e cinta americana que levaban con eles, envolvéndolle a cara e deixando unicamente un orificio para respirar.
Ademais, coa intención de que non puidese saír do lugar, atárona de pés e mans e ataron á súa vez as mans con bridas a unha barra de ferro da cociña da vivenda. Para atemorizala, ameazárona con facerlles dano aos seus fillos e netos se non lles dicía onde estaba o diñeiro.
O acusado conseguiu abrir a caixa forte que se atopaba na adega do domicilio cunha radial e apropiouse de tres reloxos, tres cadeas de ouro, dous reloxos, un anel e uns pendentes, efectos valorados en algo máis de 1.000 euros. Posteriormente, abandonou o lugar deixando á muller coas mans atadas e amordazada na cociña, onde foi atopada horas despois por uns veciños.
A Fiscalía considera estes feitos constitutivos dun delito de roubo con violencia e intimidación, outro de detención ilegal e un terceiro delito de lesións, polos que pide, en conxunto 12 anos e medio de prisión. Así mesmo, reclama que indemnice os herdeiros da muller, falecida no ano 2013, con 1.001,95 euros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.