O belén da covid: figuriñas con máscara, pozos de xel hidroalcólico e unha caseta "para pedir os ERTE"

Que serán unhas festas atípicas xa quedou claro logo de que Goberno central e Xunta o repetiran por activa e por pasiva. Coas reunións familiares restrinxidas a un total de dez persoas e dous núcleos, todo apunta a que as grandes xornadas de celebración deste ano 2020 pasarán pola porta de atrás tinxidas de preocupación e malestar. Con todo, hai quen tira de ironía para celebrar un nadal atípico e particular.

É o caso dos responsables do belén parroquial de San Pedro de Cambás, emprazado no concello coruñés de Aranga. Nesta pequena parroquia pertencente á comarca de Betanzos veñen de construír un belén que non dá puntada sen fío: en cada pequeno detalle da tradicional representación chiscan un ollo á actual situación sanitaria, dende o pozo de xel hidroalcólico ás propias figuras, ataviadas coa debida máscara.

Aínda que Xesús, María e Xosé non semellan estar a gardar a distancia de seguridade, cabe destacar que o portal si se atopa confinado e precintado. Á dereita deste, unha pequena caseta fai de "cociña económica cerrada por falta de alimentos", e xa no extremo da peza atopamos outra construción onde pastores e reis meigos poden facer "a solicitude do ERTE".

Os veciños da parroquia explican que quixeron tratar "un pouco de todo" nesta particular representación, que inclúe ao rei Herodes a piques de subir a un avión para "ir de festa cos reis e con algunha xente máis". Os reis meigos , por certo, traen o incenso e a mirra por SEUR como o máis da xente que está a mercar online. O toque críptico desta representación póñeno os cadaleitos diseminados pola escea en lembranza "da xente que morreu".