Por E.P. | SANTIAGO DE COMPOSTELA | 21/12/2020 | Actualizada ás 16:14
Os ferroláns xa poden acceder de novo ao palacio municipal do Concello de Ferrol pola súa porta principal, situada na Praza de Armas, pechada por mor da pandemia, aínda que o farán con cita previa, tal e como afirmou este luns o portavoz do goberno municipal e concelleiro de Urbanismo, Julián Reina.
A porta principal do consistorio estivo pechada desde o inicio da pandemia sanitaria, polo que, para poder acceder ás dependencias municipais, os cidadáns tiñan que facelo pola porta traseira, situada na rúa María.
Esta medida, que, segundo Julián Reina, "non podía atrasarse máis", permitirá aos ferroláns "facer cola dentro do hall e o portal, respectando o sistema de cita previa", co que se evita "que teñan que esperar á intemperie."
Para poder facer efectiva esta reapertura da porta principal, o concello acordou coa representación sindical "reforzar as medidas de seguridade", recuperando os mostradores e incorporándolles biombos, ademais de dotar a todo o persoal que atende aos cidadáns de máscaras FPP2, puntos de hidroxel e cadeiras "para que os maiores e as persoas con mobilidade reducida non teñan que esperar de pé."
O portavoz municipal quixo agradecer á representación sindical "o seu traballo e esforzo" para que esta decisión se puidese levar a cabo.
Na súa intervención, Julián Reina precisou que, do venres ao domingo, a Policía Local interpuxo 31 denuncias por infraccións relacionadas coa situación sanitaria.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.