O centro de coordinación do aeroporto santiagués opera só cun efectivo
Aena di que é debido á redución do tráfico aéreo.
Por Europa Press / Redacción | Santiago de Compostela | 05/01/2021 | Actualizada ás 17:53
O centro de coordinación do aeroporto de Santiago de Compostela opera este martes e mércores cun só efectivo tras autorizalo a axencia estatal de seguridade aérea. O que para o comité de empresa do aeroporto é unha "total imprudencia" que afecta á seguridade, Aena xustifícao como unha falta de cobertura "puntual" debido á redución do tráfico aéreo que causa a pandemia de coronavirus.
O habitual é que no centro de coordinación traballen un coordinador e un técnico, pero este último está de baixa este martes e mércores e "o aeroporto non cobre esa baixa de maneira puntual estes dous días", segundo sinalan fontes de Aena consultadas por Europa Press.
Pola súa banda, o comité dirixiu un escrito ao director do aeroporto, ao que tivo acceso Europa Press, no que denuncia que esta situación "afecta tanto á seguridade aeronáutica e operacional do aeroporto como a todas as posibles continxencias que poidan producirse no mesmo e por tanto pon en perigo a operativa normal do tráfico aeroportuario".
Segundo Aena, a solicitude á axencia estatal de seguridade realizouse e o permiso concedeuse hai unhas semanas, "debido á redución de tráfico, para non cubrir as baixas que se dean en seccións onde houbese máis dunha persoa traballando nese servizo, como este, onde operan dúas persoas".
"Como o tráfico é menor do 50% do que tiñamos, a axencia concedeu ese permiso. Considera que unha soa persoa pode facer ese traballo. Non vai estar o técnico, que é unha categoría inferior que o coordinador", precisa.
