Galicia é a comunidade con menos prazas públicas en residencias de maiores, só o 41%

As prazas de financiamento público en residencias para persoas maiores en España suman un total de 242.206 das 389.031 existentes en todo o territorio nacional, é dicir, un 62% do total. En Galicia, a porcentaxe de prazas públicas sobre o total é do 41%, cifra máis baixa de todas as comunidades autónomas, o que implica que a maioría son privadas.

Así o reflicten as cifras oficiais do IMSERSO recollidas entre as 5.542 residencias do Estado --1.435 públicas e 4.107 privadas-- e que a Asociación de Directoras e Xerentes analizou a través dun informe.

Ademais de ser a Comunidade con maior proporción de prazas privadas, este documento, sitúa a Galicia como a terceira con maior déficit de prazas residenciais. En concreto, habería unha carencia de 14.902 prazas, tan só superada por Andalucía (28.457) e a Comunidade Valenciana (21.900).

De igual modo, a galega tamén se situaría entre as únicas catro autonomías que non superan o 3% de prazas residenciais por cada 100 persoas maiores --a pesar de que a Organización Mundial da Saúde (OMS) recomenda un 5%--: Murcia (2,27%), C. Valenciana (2,77%), Galicia (2,83%) e Canarias (2,84%).

O centro DoralResidencias, en Mos, / inforesidencias.com/ MAIORES, PRAZAS RESIDENCIAS PÚBLICAS,