Continúan as nubes acompañadas de choiva este luns en Galicia

As temperaturas máximas aumentarán en xeral de forma lixeira este luns, cando se prevé tamén un aumento da estabilidade na Península e Baleares co anticiclón estendéndose desde o oeste e deixando un predominio de ceos pouco nubrados ou despexados. Unicamente no noroeste peninsular se prevé un ambiente nubrado con tendencia a cubrirse ao longo do día polo achegamento dunha fronte que deixará precipitacións e algunha treboada ocasional no terzo noroeste peninsular, que poderán ser localmente fortes no oeste de Galicia, segundo a previsión da Axencia Estatal de Meteoroloxía (Aemet).

Pola tarde haberá nebulosidade de evolución na maior parte do territorio, con chuvascos acompañados de treboada e que poderían ser localmente fortes no Pirineo, áreas prelitorais do nordeste e no norte do arquipélago balear, sen descartar as precipitacións en áreas do centro norte peninsular e en zonas de serra do sueste. De feito, a Aemet indica como fenómenos significativos para este luns os posibles chuvascos con treboadas localmente fortes no Pirineo, áreas prelitorais do nordeste e en puntos de Baleares pola tarde. As Illas Baleares avisos amarelo por choivas e treboadas. É posible que neve de forma débil no Pirineo por enriba de 1.800 - 2.000 metros. En Canarias, ceos nubrados ou con intervalos nubrados e probabilidade de chuvascos dispersos nas illas de maior relevo, máis abundantes canto máis ao oeste.

En canto ás temperaturas, aínda que as máximas aumentarán en xeral de forma lixeira, haberá descensos no extremo leste peninsular e sen cambios nas illas. As mínimas en descenso na metade este peninsular e Baleares e con poucos cambios no resto. Xeadas débiles en montañas do extremo norte. Soprará vento de compoñente oeste na Península e Baleares, sendo en xeral frouxo en zonas de interior e moderado en litorais, con posibles intervalos de forte no Cantábrico e con tendencia a rolar a compoñentes norte e leste en Baleares e na fachada oriental peninsular. Vento moderado de compoñente norte en Canarias.

Transeúntes camiñan polo centro da capital protexéndose da choiva con paraugas | Fonte: Marta Fernández - Europa Press - Arquivo