Desestimado o recurso do CSIF contra a creación do director xeral de Recursos Humanos no Concello de Ourense
Un dos argumentos esgrimidos pola CSIF facía referencia a que o decreto, como disposición particular, ía en contra da relación de postos de traballo (RTP) do Concello.
Por E.P. | OURENSE | 15/01/2021 | Actualizada ás 20:15
O Xulgado do Contencioso-Administrativo número 2 de Ourense desestimou un recurso do sindicato CSIF contra un decreto de 2019 polo que o Concello da cidade creou o posto de director xeral de Recursos Humanos.
Segundo figura na sentenza, datada a este xoves 14 de xaneiro, a organización alegaba que o decreto era nulo porque para a creación deste posto era necesaria "a modificación do anexo de persoal" nos orzamentos municipais --naquel momento, prorrogados desde 2014--. Ademais, CSIF cría que isto vulneraba a negociación colectiva "obrigatoria" como "requisito previo á modificación e aprobación do persoal".
Con todo, tanto o goberno local como o codemandado xustificaban que a creación do posto fíxose polo "órgano competente e conforme ao procedemento establecido", ademais de que é unha "figura distinta á do empregado público", polo que "non require" a modificación do anexo do persoal nos orzamentos.
Outro dos argumentos esgrimidos pola CSIF facía referencia a que o decreto, como disposición particular, ía en contra da relación de postos de traballo (RTP) do Concello, da que dicía que ten "carácter xeral". Con todo, o xulgado dá a razón ao Concello ao desmentir que a RTP teña tal carácter, senón que é un mero "acto administrativo" de acordo coa doutrina do Tribunal Supremo. Por todo iso, finalmente o Xulgado do Contencioso-Administrativo número 2 de Ourense desestimou o recurso da CSIF nun fallo contra o que o sindicato aínda pode interpor recurso de apelación nun prazo de 15 días.
PECHE PROGRAMACIÓN AUDITORIO
O goberno local de Ourense anunciou este venres que "se pospón" a programación do Auditorio durante o primeiro trimestre do ano debido á "inviabilidade de ter unha audiencia mínima" e para cooperar na "prevención da COVID-19".
Segundo trasladou o Concello nun comunicado, Ourense atópase desde esta semana no nivel máximo de restricións, polo que non pode recibir público doutros municipios limítrofes, "xa que asistir a espectáculos non é causa de permeabilidade xustificada".
O goberno local asegurou que, en calquera caso, Ourense mantén unha oferta cultural que é superior á demanda actual neste estado de alarma en nivel máximo" e que a programación do Teatro Principal "cobre perfectamente a demanda na cidade".
