O PSdeG critica o "escapismo" de Feijóo: "a culpa foi do chachachá"
Gonzalo Caballero denuncia "as súas responsabilidades" na xestión da pandemia.
Por Europa Press / Redacción | SANTIAGO DE COMPOSTELA | 18/01/2021 | Actualizada ás 13:57
O secretario xeral do PSdeG, Gonzalo Caballero, urxe ao presidente da Xunta, Alberto Núñez Feijóo, a comparecer na Cámara galega ante a súa "escapismo" para "non asumir as súas responsabilidades": "Nin nos erros das medidas que se puideron adoptar na loita contra a covid", "nin tampouco quere dar contas da ausencia dun plan de rescate suficiente para a economía de Galicia".
En rolda de prensa en Santiago, Caballero avisou de que "non hai ningunha escusa" para que Feijóo non compareza no novo período de sesións na Cámara para explicar as medidas adoptadas fronte á pandemia, despois de que o PP vetase a pasada semana, na Deputación Permanente, a petición do BNG para esta intervención --apoiada polo PSdeG--.
Tras mostrar a súa "fonda preocupación" polo avance da terceira onda en Galicia, Gonzalo Caballero pediu a Núñez Feijóo "non dilatar" máis as súas explicacións sobre as restricións, así como a presentación de "un plan de rescate suficiente para a economía de Galicia". A este respecto, acusa a Feijóo de estar "escondido en Monte Pío" e de "escapar das súas responsabilidades por non protexer aos galegos e galegas dos efectos" da terceira onda.
Sobre este extremo, indica que o propio presidente da Xunta "recoñeceu" que as medidas postas para Nadal "non foron suficientes para protexer aos galegos fronte á covid". E é que "para Feijóo, como di por aí un vídeo que está a circular moito nas redes, a culpa foi do chachachá".
Así, avisa de que a Xunta debe "rectificar as carencias na planificación económica para 2021" tras os cambios propiciados polo coronavirus. "Se deixamos pasar o tempo imos chegar tarde e mal, tanto para defender a saúde, como para defender a economía", sostén. Con todo, o líder dos socialistas galegos asegura "tender a man" á colaboración co titular do Executivo autonómico nun semestre que augura "moi complexo".
Ademais, insta aos populares a abandonar a "estratexia do pimpampum" contra o Goberno central nun "debate gratuíto" achega do estado de alarma, pois afirma que é un "momento de responsabilidade".
