O Complexo Turístico de Albeida, en Serra de Outes, premiado polos Colexios de Arquitectos de España

O Complexo Turístico de Albeida, en Serra de Outes (A Coruña) e as novas directrices de Ordenación Territorial do País Vasco foron elixidos como gañadores dos premios de Arquitectura e Urbanismo 2020 do Consejo Superior de los Colegios de Arquitectos de España (CSCAE).

Ademais, concedéronse dúas mencións en Arquitectura á rehabilitación do Arquivo Histórico de Ourense e ao Centro Social de Cornido, na Coruña.

Neste sentido, o presidente do CSCAE, Lluís Comerón, destaca que "a boa arquitectura crea ou transforma edificios, cidades e territorios, para mellorar o benestar das persoas, respondendo as prioridades colectivas de cada época".

Ao seu xuízo, as propostas que este ano obtiveron os premios de Arquitectura e Urbanismo do CSCAE son "dous magníficos exemplos" diso, pois achegan "talento, innovación e compromiso", a día de hoxe "unha referencia de calidade para a 'onda de renovación' que promoven os fondos europeos de recuperación".

En última instancia, o presidente dos Arquitectos lamenta que o parque edificado en España "ten grandes déficits en materia de eficiencia enerxética, accesibilidade e funcionalidade", e as obras gañadoras representan así "unha aposta pola sustentabilidade, a habitabilidade, o confort e o benestar das persoas".

No caso do Complexo Turístico de Albeida e das novas directrices de Ordenación Territorial do País Vasco, o xurado de arquitectos considera que os dous proxectos conxugan os valores arquitectónicos coa sustentabilidade, a optimización de recursos, á vez que aspiran ao reequilibrio entre os hábitats urbano e natural, en sintonía cos obxectivos da 'Axenda 2030' da ONU.

Sobre o complexo turístico galego, destacan a "gran musicalidade e permeabilidade" que posúe ao "optimizar recursos de forma práctica xerando unha arquitectura posible e sustentable".

O xurado considera que a obra se sitúa no lugar "con respecto, e cunha implantación mínima sobre o terreo", á vez que aproveita os recursos "ao máximo" e dá lugar a "resultados óptimos de forma harmonizada".

O complexo turístico de Albeida está situado na ría de Muros e Noia. É obra dos arquitectos Alfonso Salgado Suárez e Francisco Liñares Túñez.

O proxecto integra a rehabilitación de tres edificacións tradicionais que, ata ese momento, foran unha residencia e un estudo de gravación, coa construción de 9 aloxamentos que respectan a vexetación do lugar e reforzan a historia do xa edificado.

Desde o estudo gañador, Francisco Liñares valora que o Premio de Arquitectura 2020 é un impulso ao traballo que Salgado e Liñares Arquitectos vén realizando nos últimos anos.

"Premiouse unha forma de traballar que non pon o acento na forma, que dialoga coas preexistencias, cunha vontade evidente de integración nun territorio moi complexo, profunda e sabiamente humanizado; e co feito construtivo como fío condutor de todo o proceso arquitectónico", considera Alfonso Salgado.