O centro de control de avarías de Naturgy da Coruña será trasladado a Madrid
A empresa indica que se "unifica" este centro na instalación de Madrid, ao que suman outros cambios como "trasladar a Galicia as responsabilidades de medioambiente e de planificación da rede para toda España que antes estaban en Madrid".
Por E.P. | A CORUÑA | 03/02/2021 | Actualizada ás 19:06
Naturgy trasladará a Madrid o centro de control de avarías situado na Coruña, segundo confirmaron fontes da compañía que o atribuíron a unha "mera reorganización" e descartaron que poida ter repercusión na prestación do servizo.
En concreto, indicaron que se "unifica" este centro na instalación de Madrid, ao que suman outros cambios como "trasladar a Galicia as responsabilidades de medioambiente e de planificación da rede para toda España que antes estaban en Madrid".
Por outra banda, manifestaron que no ano 2000 había sete centros de control operativo destas características en España, destinados a detectar as incidencias na rede, e que agora só quedaban o da Coruña e Madrid.
"O avance das novas tecnoloxías e a dixitalización permite dar cobertura a toda a rede desde un único punto", apuntaron desde a empresa, que aseguran que as brigadas que se encargan de emendar as avarías seguen en Galicia.
No entanto, indican que esta situación "non implica ningún despedimento de ningún dos 28 empregados que actualmente ten o centro da Coruña". Deles, dixeron que "se lles ofreceu continuar co seu mesmo traballo nas instalacións de Madrid" e engaden que é "prioridade" para a compañía "buscar solucións negociadas e pactadas con todos os empregados".
Así mesmo, argumentan que "na actualidade hai outros servizos que a compañía dá ao resto de España desde Galicia, como é o caso do Centro de Control Integrado de Infraestruturas Hidráulicas".
