Por Jessica Fernández | SANTIAGO DE COMPOSTELA | 19/02/2021 | Actualizada ás 13:29
O Foro Económico de Galicia, nunha análise recollida no documento 'Previsións de crecemento para a economía galega. PIB de Galicia ano 2021', lanzado este venres, 19 de febreiro, pola entidade prevé que a economía galega medre entre un 4,8% e un 8,8% no 2021.
Asinado polos economistas Santiago Lago, José́ Francisco Armesto, José́ María da Rocha, Fernando González Laxe e Patricio Sánchez, o estudo analiza os escenarios prospectivos da entidade para este ano. Así, contemplan para Galicia dúas posibles evolucións dependendo fundamentalmente da evolución sanitaria da pandemia, da velocidade e eficacia do proceso de vacinación e, a partir de aí, da normalización da vida económica.
“A evolución máis optimista suporía un crecemento do +8,8% do PIB e a pesimista un aumento do PIB ao redor do +4,8%. Pola contra, no caso de que fose preciso realizar un novo confinamento semellante ao dos meses de marzo e abril de 2020, sufriría unha caída do -1,5% do conxunto do ano”, indican desde o foro.
IMPACTO DOS FONDOS NEXT GENERATION EU
Con respecto a estas previsións, os responsables da análise recoñecen que non recollen o impacto positivo dos Fondos Next Generation EU "polas incertezas que existen aínda sobre os proxectos tractores que serán apoiados e a súa ubicación xeográfica e tamén pola celeridade na execución".
Deste xeito, indican en nota de prensa dende a entidade que, "supoñendo que o impacto en Galicia sexa homoxéneo respecto ao que o Banco de España ten cuantificado para a economía española, as cifras anteriores elevaríanse, respectivamente, ata máis dun 10,1% e máis dun +5,4%".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.