A CEOE ofrece a Feijóo a "loxística" de grandes empresas e mutuas para a vacinación masiva en primavera

Contabiliza en 200 as empresas e 54 centros das mutuas os que poderían aportar apoio á campaña.

Por Europa Press / Redacción | Santiago de Compostela | 25/02/2021 | Actualizada ás 20:25

Comparte esta noticia

O presidente da Confederación Española de Organizaciones Empresariales (CEOE), Antonio Garamendi, ofreceu ao presidente da Xunta, Alberto Núñez Feijóo, a "loxística" das empresas de máis de 250 traballadores, que teñen servizos médicos, así como a das mutuas, para vacinar contra a covid a partir de abril ou maio.

O presidente da CEOE, Antonio Garamendi
O presidente da CEOE, Antonio Garamendi | Fonte: Europa Press - ESADE - Arquivo.

En concreto, Garamendi presentoulle o plan 'Sumamos Saúde+Economía', co que a patronal española ofrece "colaboración público-privada" para atallar a pandemia do coronavirus, co ánimo de "desconxestionar" os servizos públicos de saúde.

De acordo cos datos que ofreceu o presidente da CEOE despois da reunión con Feijóo, en Galicia hai máis de 200 empresas con máis de 250 traballadores e un total de 54 centros das mutuas.

"O que estamos a expor é (para) cando estean as vacinas (...) Agora non é o momento", explicou.

Así, Garamendi indicou que agora mesmo "sobra xente" para dispensar a vacina, e que o seu ofrecemento o fan para "cando cheguen" en máis cantidade, momento que situou a finais de abril ou en maio. "É sinxelo", destacou.

En calquera caso, engadiu que se o Sergas "pensa que non é necesario" non pasa "nada". "Estamos a ofrecer este tema que pensamos que se pode facer dunha forma sinxela", profundou.

Así mesmo, agregou que as empresas privadas poden "chegar a ofrecer algún outro elemento, algún centro móbil nun polígono" ao que estarían "dispostas" a acudir, e citou exemplos que se barallan noutras comunidades autónomas.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta