O Concello de Pontevedra esixe verificar a seguridade de Ence á que pedirá un informe sobre a súa situación

O Concello de Pontevedra esixe á Xunta e ao Goberno que verifiquen a seguridade da fábrica de Ence e tamén fará un requirimento formal á empresa para que aclare a situación do complexo industrial de Lourizán.

Para o goberno municipal de Pontevedra --formado por BNG e PSOE-- o contido do vídeo no que o presidente de Ence, Ignacio de Colmenares, alerta da posibilidade de que "en calquera momento" haxa un "susto maiúsculo ambiental" na fábrica de Lourizán, é "moi preocupante".

Así, a portavoz do goberno local, Anabel Gulías, dixo este luns que o Concello ten "claro que coa tranquilidade e co soño das pontevedresas e dos pontevedreses non vai xogar nin Ence nin ninguén", asegurou en rolda de prensa.

Anabel Gulías valorou como "escandalosas" as declaracións do máximo responsable da compañía pasteira por isto sinalou que "todas as formacións políticas deste Concello" deberían "ter a mesma postura de esixirlle á empresa que abandone esta política de confrontación e coacción e que aclare dunha vez por todas cal é a situación da pasteira neste momento".

Gulías referiuse así ao vídeo que se difundiu no fin de semana no que o presidente de Ence alertaba dun posible problema de seguridade na fábrica de Pontevedra se non se facía un investimento de 200 millóns de euros.

REQUIRIMENTO FORMAL

Tras coñecerse o vídeo, Anabel Gulías anunciou que o goberno municipal, no marco das súas competencias, fará un requirimento formal á empresa "para que aclare esa situación de inseguridade que o propio presidente da pasteira comenta no vídeo". Ademais, notificará de oficio á Xunta de Galicia, nas consellerías competentes e ao propio Ministerio para que verifiquen a situación e controlen a seguridade da fábrica.

"Necesitamos saber e precisamos ter a certeza e a seguridade de que 84.000 veciños e veciñas de Pontevedra viven nunha contorna segura" insistiu Anabel Gulías a este respecto.

Tamén indicou que a difusión das declaracións do vídeo responden a unha traxectoria e a unha liña de acción baseada en "chantaxes, coaccións e ameazas", encamiñada, segundo explicou, a "seguir obtendo privilexios e seguir sendo a única empresa que parece que ten barra libre para que lle fagan leis a medida e para saltarse condicionamentos legais".

Así mesmo, Anabel Gulías pediulle aos responsables da empresa que "deixen de xogar, que deixen de lanzar este tipo de ultimato co fin de amedrentar, coaccionar e asustar e que fagan efectivo o traslado da pasteira, e que o fagan como fan todas as empresas, sen pedir ningún trato de favor".

REACCIÓN DO PARTIDO POPULAR

O portavoz do grupo municipal do Partido Popular de Pontevedra, Rafa Domínguez compartiu a "dobre preocupación" que lle produciu o vídeo do presidente de Ence Ignacio de Colmenares no que alerta da posibilidade "dun susto maiúsculo ambiental".

"A primeira preocupación é oir ao máximo dirixente de Ence dicir que pode haber un problema ambiental", sinalou Rafa Domínguez que "como pontevedrés por suposto" que o "preocupa".

O portavoz popular comentou en rolda de prensa que consultou estas afirmacións de Colmenares. "E dinme que cumpre con todas as medidas da Dirección Xeral de Calidade Ambiental", sinalou. Ademais, engadiu que as inspeccións "rigorosas" que se fixeron á fábrica de celulosas "cúmpreas". Aínda que reiterou que esa afirmación do presidente da compañía pasteira "desde logo á miña déixame certa preocupación".

En todo caso Rafa Domínguez tamén indicou que "máis preocupación" lle deixa que están, "probablemente, ante un inminente peche que vai deixar na rúa en Pontevedra a 500 familias". "Non creo que en Pontevedra no ano da crise, no ano máis complicado economicamente, sexa unha boa noticia", apostilou. "Vai ser un golpe para a cidade terrible", concluíu.

Fábrica de Ence Celulosa en Pontevedra / Europa Press. / Europa Press