Por E.P. | SANTIAGO DE COMPOSTELA | 04/03/2021 | Actualizada ás 15:42
O BNG reclama a reactivación da comisión mixta entre o Goberno central e a Xunta para promover a transferencia da titularidade da AP-9 e do resto de competencias pendentes e sobre as que existen acordos parlamentarios.
Entre elas, o deputado Néstor Rego lembrou as de transportes, tráfico, seguridade viaria e pública, reclamada pola Cámara galega pero que "choca co desinterese das forzas estatais". A pesar diso, o caso da AP-9 é "sen dúbida a reclamación máis sentida" pola cidadanía para "pór fin á estafa legalizada" aos cidadáns e a administración.
Rego sinalou que "en 12 anos de goberno" de Alberto Núñez Feijóo en Galicia, a Xunta non asumiu "nin unha soa competencia", cuestión que atribúe a unha política "deliberada" de "minguar a capacidade" da comunidade autónoma "para decidir sobre os seus asuntos".
Sobre a AP-9, o BNG denuncia que leva "máis de cinco anos de demora" dunha iniciativa reivindicada "polo conxunto da cidadanía galega", polo que insta a arrincar os contactos e negociacións para impulsar o cambio de titularidade e as competencias necesarias.
Rego cre "urxente abrir a vía" de diálogo directa sobre a autoestrada, cuestión que "non debe obstaculizar" outras liñas de acción nin tampouco que impedir que se complete a tramitación parlamentaria no Congreso da Lei de transferencia da vía, xa admitida a trámite.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.