O BNG reclama datas alternativas do MIR para persoas confinadas
O deputado Néstor Rego insiste na necesidade de eliminar a taxa de reposición.
Por E.P. | SANTIAGO DE COMPOSTELA | 06/03/2021 | Actualizada ás 19:14
O deputado do BNG no Congreso, Néstor Rego, rexistrou varias preguntas sobre os exames de acceso á sanidade especializada, por exemplo o MIR, para solicitar ao Goberno estatal que habilite datas alternativas para quen non poida presentarse por dar positivo en covid-19 ou ter que estar confinados por ter síntomas.
"Debe facilitarse a incorporación de profesionais sanitarios, non dificultarse", explica Rego, quen ademais critica que a orde do Ministerio que fixaba os exames para o próximo 27 de marzo non recolle "ningunha previsión" para este tipo de incidencias.
Neste contexto, o deputado nacionalista lamenta que nas instrucións publicadas posteriormente "se prohíbe acudir a aquelas persoas que teñan algún tipo de síntoma" de infeccion por coronavirus. Así, Rego ve "totalmente inxusto" non ofrecer a posibilidade de examinarse durante, polo menos, un ano máis.
Para o deputado do Bloque, a "preocupación" do Ministerio "debería ser acabar coa precariedade e temporalidade" no sistema público. Para iso, ve tamén "imprescindible eliminar a taxa de reposición".
"Hai que lembrar que unha das recomendacións da comisión para a reactivación do Congreso, incorporada a instancia do BNG, era a eliminación da taxa de reposición para garantir a cobertura total das vacantes de forma estable e a incorporación de novos profesionais. O Goberno ten que eliminala", incide finalmente.
