A Garda Civil denuncia o "atraso" na vacinación do Sergas: "imos ser os últimos de todo o territorio"

Continúa a polémica no reparto das vacinas por parte do Sergas. Na mesma semana en que o Servizo Galego de Saúde anuncia que comezará a chamar á poboación xeral de 50 a 55 anos para recibir o preparado de AstraZeneca, foron varios os colectivos que alzaron a voz para protestar contra as problemáticas do proceso de vacinación coordinado polo organismo dependente da Consellería de Sanidade.

O último sector en petar na mesa foron os gardas civís de Galicia. A diferenza doutros colectivos, aos que o Sergas decidiu non incluír na listaxe de vacinación prioritaria, os axentes da benemérita si forman parte deses primeiros grupos profesionais que contarán con preferencia na cola da inmunización. O problema chega, explican, polos “retrasos” que están a ter lugar no reparto das vacinas e que provocará que sexa “dos últimos” en ser vacinados en todo o Estado.

Segundo explica o sindicato UnionGC, o Sergas non chamou aínda a se vacinar aos gardas civís de Galicia “cando o resto de servizos sanitarios doutras CCAA xa vacinaron os seus gardas civís”. De acordo coa mesma fonte, a día de hoxe os axentes deste corpo destinado en Galicia aínda non teñen data de vacinación, unha situación de “abandono” que persiste a pesar de que os trámites burocráticos para o reparto dos preparados comezou “hai dúas semanas”, explican.  

Dende o sector non perderon oportunidade de reivindicar o servizo “exemplar” prestado na pandemia. O papel “esencial” da súa profesión, sosteñen, levou a esa cualificación preferente por parte do Goberno que agora teñen que levar a cabo as comunidades autónomas pero que, no caso de Galicia, persiste ancorada ante os xa amentados “retrasos” do Servizo Galego de Saúde.