Os novos xulgados do social de Vigo, A Coruña e Lugo entrarán en servizo o 31 de marzo
"Non foi posible que entrasen en funcionamento a finais do mes de decembro, porque a Xunta comunicou que ata o 31 de marzo non podía dispor dos medios necesarios" dixo o delegado do Goberno, Javier Losada.
Por E.P. | SANTIAGO DE COMPOSTELA | 13/03/2021 | Actualizada ás 19:48
O tres novos xulgados do social de Vigo (número 7), A Coruña (número 7) e Lugo (número 4) entrarán en servizo o próximo 31 de marzo, segundo figura na orde do Ministerio de Xustiza que publica este sábado o Boletín Oficial do Estado (BOE).
Nun comunicado, o delegado do Goberno en Galicia, Javier Losada, destaca que o Executivo central cumpre coa comunidade galega, tal e como anunciara o Ministerio. Por iso, agradece a boa disposición do ministro de Xustiza, Juan Carlos Campo, para reforzar a xustiza galega ante a acumulación de casos provocada pola pandemia.
O delegado do Goberno lembra que a creación dos novos xulgados foi decidida polo Ministerio de Xustiza en 2020, "pero non foi posible que entrasen en funcionamento a finais do mes de decembro, como era desexo do Ministerio, porque a Xunta comunicou que ata o 31 de marzo non podía dispor dos medios, materiais e humanos, necesarios para a súa entrada en funcionamento".
