A Xunta lanza un programa de residencias literarias no Gaiás para evitar a "soidade da creación" dos escritores noveis
Na primeira sesión estarán as escritoras Sara Mesa e Berta Dávila.
Por Europa Press / Redacción | SANTIAGO DE COMPOSTELA | 19/03/2021 | Actualizada ás 21:30
A Xunta de Galicia anunciou a posta en marcha da 'Residencia Literaria Cidade da Cultura', un novo programa deseñado para o apoio e acompañamento de escritores emerxentes e inéditos, baseado no intercambio de experiencias e a posta en común de coñecementos.
Trátase dun proxecto especialmente concibido para menores de 35 anos, pero aberto a aspirantes de todas as idades no que, baixo a dirección do escritor Javier Pena, terán a oportunidade de compartir impresións e aprendizaxes con grandes figuras do panorama literario actual, como Sara Mesa e Berta Dávila, que participarán nesta primeira edición.
A Residencia Literaria da Cidade da Cultura nace baixo a premisa de que unha das dificultades que enfrontan os escritores noveis é a soidade da creación, a falta de guía no proceso e a ausencia de valoración externa.
Deste xeito, o programa quere facilitarlles aos seus participantes unha disección do proxecto literario propio, á vez que lles convida a aprender da análise dos traballos dos compañeiros tamén da análise de lecturas relacionadas coa súa escritura, de charlas con autores de primeiro nivel ou intercambios con outras disciplinas artísticas.
A residencia tamén axudará ao crecemento persoal compartindo tempo e espazo con persoas moi diferentes cunha paixón en común: a literatura.
DEZ PRAZAS
Esta primeira edición --que conta con prazo de inscrición aberto ata o 16 de abril-- abre un total de dez prazas, das que oito estarán reservadas a persoas de ata 35 anos e outras dúas non contarán con límite de idade. Poderán participar persoas nadas ou residentes en Galicia que queiran desenvolver ou mellorar un proxecto inédito de narrativa.
O dez persoas seleccionadas participarán, gratuitamente, nun programa intensivo de actividades que se desenvolverá na Cidade da Cultura entre o luns 5 de xullo e o venres 16 de xullo de 2021.
