Manifesto galego do Día Mundial do Teatro por unha "arte inmortal"

O actor Evaristo Calvo foi o encargado de escribir este ano o manifesto galego do Día Mundial do Teatro, no que reivindica a escena como "unha arte inmortal" e aos intérpretes como o "órgano vital" do sector escénico.

"Os intérpretes somos un órgano vital no corpo desta arte inmortal. O teatro non vai morrer, pero hoxe sofre cando este órgano adoece de fame e medo", advirte Calvo, ao respecto da situación que atravesan os profesionais deste oficio por mor da pandemia.

No Manifesto, que cada ano promove a Asociación de Actores e Actrices de Galicia, faise referencia para os efectos da pandemia sobre o teatro, un sector fortemente golpeado pola situación actual. "Celebramos o Día Mundial do Teatro cun contexto presuntamente provisorio no que está restrinxida a razón de existencia do teatro, que é a congregación, o encontro en lugar e tempo das persoas que toman parte do fenómeno artístico teatral", reflexiona Calvo.

Con todo, precisa, "esta peste imprevista vén sumarse a outras pestes que parecen formar parte indisociable do oficio: o desemprego e a baixa consideración social dos artistas".